Të sëmurët pa analiza, koncesionari dhe ministria nuk pranojnë problemin/ "Fiks Fare" zgjidh situatën

8 Korrik 2022, 21:30, Denoncim CNA

Të sëmurët pa analiza, koncesionari dhe ministria nuk

Emisioni "Fiks Fare" solli para disa ditësh problemin e analizave të qytetarëve në Vlorë.

Ata ishin të detyruar që analizat t’i kryenin në privat pasi laboratori nuk funksiononte. Mjekët e familjes për këtë situatë të krijuar fajësonin koncesionarin.

Por e njëjta problematikë paraqitet në Tiranë dhe Elbasan. Bashkëpunëtorët e "Fiksit" në bazë të ankesave të qytetarëve shkojnë në poliklinikën e Elbasanit. Bashkëpunëtori paraqitet si i afërmi i dikujt me probleme “Ishemi Cerebral” dhe i duhet të përfitojë kemp.

Por njësoj si qytetarët edhe bashkëpunëtori i "Fiksit" sorollatet duke mos marrë zgjidhje. Në recepsion i thonë se laboratori i analizave ka një javë që nuk punon dhe vijon të mos funksionojë, ndaj i sugjerojnë të takojë mjeken për shpjegimin se ku t’i bëjë analizat. Bashkëpunëtori takon mjeken, e cila i thotë që zgjidhjen duhet t’ja japë infermierja dhe jo ajo.

Bashkëpunëtori shkon takon infermieren. Ajo i thotë se nuk është personi që mund t’i japë shpjegime për analizat, ndaj duhet të shkojë për këtë punë te laboratori. "Fiksi" shkon për të marrë përgjigje në laborator për analizat. Këtu jo vetëm që nuk i japin përgjigje, por e drejtojnë bashkëpunëtorin e "Fiksit" sërish te recepsioni për të marrë informacion. Pra, e kthyen sërish nga fillimi karvanin e sorollatjes për qytetarin dhe nuk i japin zgjidhje.

Gazetarët e "Fiksit" kërkojnë për këtë problematikë përgjigje te koncesionari. Sipas përgjigjes së koncesionarit të kthyer për "Fiksin" analizat janë kryer për të gjithë pacientet e referuar dhe nuk ka pasur probleme, por mjekët e familjes nuk kanë referuar pacientë. "Fiksi" kontakton me disa prej mjekëve të familjes, të cilët thonë se kanë marrë mesazhe që të mos referojnë pacientë. Gazetarët e "Fiksit" për këtë kërkojnë përgjigje në Ministrinë e Shëndetësisë, e cila në përgjigje për "Fiksin" nuk e pranon problemin, por këtë përgjigje e ktheu pasi u rregullua gjithçka.

Pra, situata u përmirësua pas interesimit të "Fiksit", këtë gjë e faktuan dëshmitë e mjekëve në Elbasan. Këta të fundit pranuan për "Fiksin" se problemi u zgjidh pas 10 ditësh./tch

Lajmet e fundit nga