LEXO PA REKLAMA!

SHKARKO APP

SPAK siguron dokumentet e Vjollca Hoxhës/ Dyshime për pastrim parash te pagesat nga afera e inceneratorëve

22 Prill 2024, 14:44, Aktualitet CNA
SPAK siguron dokumentet e Vjollca Hoxhës/ Dyshime për pastrim parash
Mirel Mërtiri, Klodian Zoto dhe Vjollca Hoxha

Vjollca Hoxha, një nga pronaret e “Top Channel” tashmë është nën hetim zyrtarisht nga SPAK-u.

Ajo është thirrur në SPAK. Banesa e saj është kontrolluar në lidhje me aferën e inceneratorëve dhe pagesave që ka marrë televizioni “Top Channel” gjatë kohës që Vjollca Hoxha ka qenë administratore e këtij televizioni.

Sipas burimeve zyrtare, CNA ka mundur të konfirmojë se nga Bullgaria kanë ardhur dokumentet ku janë konfirmuar pagesat prej 1.5 milionë euro të kompanisë “EM Capital Group” ku aksionerë ishin Klodian Zoto, Mirel Mërtiri dhe shtetasja Eva Blushi, bashkëshortja e ish-deputetit të LIBRA-s dhe ish-deputetit socialist, Ben Blushi.

Në atë kohë, ky i fundit ishte drejtor i Përgjithshëm i “Top Channel”.

Vjollca Hoxha ka firmosur një kontratë me kompaninë “EM Capital Group” për shitjen e aksioneve të “Valtelina Caffe”, e njohur ndryshe si brand-i “Lori Caffe”.

Shuma e shitjes 2.2 milionë dollarë, 1. 6 milionë do të paguheshin direkt, ndërsa 600 të tjera do të paguheshin me këste 100 mijë euro në muaj. (LEXO KETU)

Gjithashtu janë mbledhur të dhënat dhe është hetuar edhe në lidhje me një kompani tjetër ku aksionere ishte Stela Gugallja dhe Vjollca Hoxha.

CNA ka mundur të sigurojë të dhëna zyrtare se SPAK-u ka kryer procedurën hetimore dhe jo thjesht dhe vetëm mbledhjen e dokumenteve të kompanive, por ka mundur të sigurojë edhe kontrata për pagesat e tyre të kryera nëpër banka qarkullimet që kanë pasur, të cilat janë shuma të mëdha me miliona e miliona euro.

CNA ka raportuar shpesh se “Top Channel” është një media e paguar nga afera e inceneratorëve nga njerëzit e saj.

“TOP CHANNEL”, NË SHËRBIM TË “TRURIT” TË INCENERATORËVE

SPAK siguron dokumentet e Vjollca Hoxhës/ Dyshime për pastrim parash
Fotomontazh - Vjollca Hoxha, në sfond godina e "Top Channel"

Mërtiri, “Top Channel”-in e ka pasur dhe e ka ende një media në shërbim, ku ka strehuar edhe njerëzit e tij. Ai e ka përdorur “Top Channel”-in së bashku me Klodian Zoton për sulme kriminale ndaj prokurorëve të SPAK-ut.

Pra, kemi të bëjmë jo vetëm me një aferë inceneratorësh që paguan me miliona euro një televizion kombëtar me transferta të dyshimta, të cilat nuk dihen pse, pasi kompania e inceneratorit ishte një kompani monopoliste dhe reklama nuk i duhej dhe nga ana tjetër kemi përballë faktin e sulmeve ndaj prokurorëve të SPAK-ut.

Mirel Mërtiri me akuzat që ngre nga “Top Channel” ndaj ish-zëvendëskryeministrit Arben Ahmetaj e detyroi këtë të fundit të arratisej dhe u ushtrua presion ndaj drejtësisë duke e quajtur Ahmetajn bashkëpunëtor të Klodian Zotos, por duke shpëtuar veten e tij, deri në momentin ku SPAK-u e mori në akuzë si “trurin” e inceneratorëve.

Por nga ana tjetër, Mirel Mërtiri dhe bashkëjetuesja e tij Stela Gugallja ishin ortakë të Vjollca Hoxhës dhe “Top Channel” ishte përdorur për të shpëtuar Mirel Mërtirin, pra për propaganda për të devijuar hetime dhe nga ana tjetër është ushtruar shantazh dhe kërcënim ndaj prokurorëve të SPAK-ut në mënyrë të vazhdueshme me emisione speciale kundër tyre, kundër hetimeve, duke shantazhuar dhe kërcënuar drejtësinë për të mos i shkuar deri në fund të vërtetës.

LIDHJA E MIREL MËRTIRIT ME VJOLLCA HOXHËN, PAGESAT PËR “TOP CHANNEL”

Në fakt, e vërteta e bashkon Mirel Mërtirin edhe me Vjollca Hoxhën dhe më pas ai zgjodhi një tjetër televizion për të dalë dhe për të akuzuar sërish prokurorët e SPAK-ut, Klodian Brahon, atë që kishte hetuar dosjen e Elbasanit, i cili mori kërcënime të drejtpërdrejta, një sulm mafioz nga Mirel Mërtiri, thjesht dhe vetëm se kishte në hetim dosjen “5D” të drejtorëve të Veliajt të arrestuar pak javë më parë.

Vjollca Hoxha tashmë është një person nën hetim me një mal me dokumente të gjetura nga SPAK-u, mes të cilave publikuar dhe denoncuar nga CNA.

Me një mal me materiale, pagesa me thasë, flitet gjithmonë me miliona euro të dhëna për  “Top Channel”, televizion kombëtar që është ortak i aferës së inceneratorëve, që mori para për të shantazhuar e kërcënuar prokurorët e SPAK-ut, të cilët kanë qenë vazhdimisht nën presionin dhe dhunën mediatike të një televizioni kombëtar thjesht dhe vetëm se ky i fundit ishte në ortakëri me Mirel Mërtirin dhe Klodian Zoton.

SPAK siguron dokumentet e Vjollca Hoxhës/ Dyshime për pastrim parash
Fotomontazh - Mirel Mërtiri dhe Klodian Zoto

Top Channel i ka shërbyer bandës së inceneratorëve në krimin dhe vjedhjen monstruoze që u është bërë shqiptarëve me një kontratë koncesionare monopoliste për ndërtimin e një inceneratori që nuk ekziston, por që shqiptarëve dhe biznesit u ka kushtuar të paktën 130-150 milionë euro, nga të cilat disa miliona euro janë marrë prej “Top Channel” me fatura të drejtpërdrejta, me shkëmbime, me shitje kuotash, kthimin e tyre pa asnjë lek dhe deri te pagesat për dhjetëra kompani të ndryshme, të gjitha në selinë e “Top Channel”.

Vjollca Hoxha vazhdon të jetë në hetim në lidhje me çështjen e inceneratorit të Tiranës dhe ortakëritë që ka pasur me ta, ka dyshime për pastrim parash dhe pas mbylljes së hetimeve pritet që prokurorët të çojnë aktet e tyre në gjykatë dhe atje do të mësojmë a do të kemi një akuzë të drejtpërdrejtë ndaj pronares së “Top Channel”, e cila e ktheu televizionin kombëtar në një shërbëtor të një kontrate koncesionare plehrash./ CNA

Lajmet e fundit nga