Skandali me dosjen "5D"/ Kalaja, për CNA TV: Protestat do të vazhdojnë deri në arrestimin e Veliajt

22 Prill 2024, 14:27, Aktualitet CNA

Skandali me dosjen "5D"/ Kalaja, për CNA TV: Protestat do të

Adriana Kalaja

“Protestat do të vazhdojnë deri në arrestimin e Erion Veliajt.”

Kështu ka deklaruar aktivistja Adriana Kalaja, në një prononcim për CNA TV, me gazetaren Fabjona Pasho.

"Protesta jo vetëm që do të vazhdojë, jo vetëm që do jetë edhe më e fortë, edhe më e madhe në numër, por ne kemi dhënë fjalën, që do të vijojmë deri në ditën kur Erion Veliaj do të jetë i arrestuar. Ne kemi thënë kush është kundër korrupsionit, kush është kundër këtyre skandaleve të paprecedenta në Bashkinë e Tiranës, kundër modelit që Erion Veliaj ka shkatërruar Tiranën dhe vazhdon ta shkatërrojë, le të na bashkohet.

Ne s'kemi asnjë lloj problemi me veten tonë, sepse ne themi nëse jeni në këtë pikë bashkë me ne, hajdeni, bashkohuni. Nëse ju pretendoni se duke bërë ato etiketimet jo të mira, një pjesë e atyre që sot janë të rreshtuar në krah të pazarxhiut Lulzim Basha, kanë guximin edhe bëjnë ironi dhe të tallen. Ne i themi, nëse i dukemi pak, le të na bashkohen, që të bëhemi shumë, edhe për të qenë në sinkron, nëse e kanë seriozisht kur thonë që janë në opozitë."

Kalaja shprehet se vjedhjet e ndodhura në Bashkinë e Tiranës janë të paprecedenta dhe të padëgjuara më parë, si edhe tregon prapaskenat gjatë protestës së qytetarëve.

"Historia e '5D' është shokuese, që nuk ka ndodhur gjatë gjithë kësaj periudhe të tranzicionit tonë të gjatë, por edhe nga eksperienca në vendet që na rrethojnë, apo atyre që sot janë pjesë e BE, është rast i padëgjuar se si disa drejtorë të rëndësishëm marrin guximin, jo vetëm për të ngritur një kompani për të përfituar tenderë, por duke grabitur 100% taksat e qytetarëve të Tiranës.

Reagimi duhet të jetë më i fortë. Protesta organizohet paradite, një pjesë e qytetarëve janë në punë, studentët në fakultete. Ne kemi zgjedhur këtë orar për të rrethuar në mënyrë simbolike bashkinë në orarin zyrtar të punës. Ato jo vetëm që nuk shkojnë në punë në ditët normale, por në ditët që ne bëjmë protestë bashkia rrethohet, mbyllet."

Skandali i dosjes "5D" ka marrë vëmendjen e mbarë opinionit publik, gjë që ka nxitur protesta pranë Bashkisë Tiranë, ku qytetarët të revoltuar kërkojnë dorëheqjen e kryebashkiakut Erion Veliaj, i cili tashmë ka drejtorët dhe bashkëpunëtorët e tij të ngushtë pas hekurave për zhvatjen e miliona eurove nga taksat e qytetarëve, nëpërmjet përvetësimit të tenderëve./ CNA