Shqipëria po zbaton 6 projekte rrugore të rrjetit TEN-T, 137 km me kosto 1 mld euro

8 Qershor 2024, 22:54, Aktualitet CNA

Shqipëria po zbaton 6 projekte rrugore të rrjetit TEN-T, 137 km me

Foto ilustruese

Shqipëria është duke zhvilluar punime në 6 segmente rrugore të rrjetit kryesor europian të infrastrukturës (TENT), 5 prej të cilave janë në rrjetin kryesor të korridoreve Europiane dhe një është degëzim me rrjetin kryesor.

Komuniteti i Transportit që koordinon politikat dhe investimet në projektet që lidhen me infrastrukturën e rëndësishme Europiane analizoi se gjatë vitit 2023 Shqipëria ka në proces të punimeve në 137,7 km (132,88 km në Rrjetin Kryesor dhe 4,83 km në rrjetin gjithëpërfshirës).

Të dhënat zyrtare nga Komuniteti i Transportit referojnë se vlera e projekteve në rrjetin në rrjetin kryesor 1,058,540,000 euro.

Vitin e kaluar 4 projekte të reja kaluan në statusin “në vazhdim”, 3 prej të cilëve në Korridorin Jon- Adriatik dhe 1 në Korridorin- 8.

Në Korridorin Adriatiko -Jonian po punohet seksionin 4: Thumanë – Kashar, dhe Lekaj – Konjat – Fier. Ndërsa në Korridorin 8 po punohet në ndërtimin e rrugës Elbasan – Përrenjas (shiko tabelën e mëposhtme).

Afatet për përfundimin e tyre nisin nga ky vit deri më 2027.

Në Shqipëri janë dy Korridore Rrugore dhe hekurudhorë që pjesë e rrjetit bërthamë të Bashkimit Europian.

Korridori VIII përfshin autostradën dhe linjën hekurudhore. Të dy nisin në bregdetin italian të Adriatikut në Bari ose Brindisi, me një traget që kalon në Durrës në Shqipëri .

Nga atje rrugët përshkojnë Ballkanin jugor në Bullgari dhe prej andej në Varna , në bregun bullgar të Detit të Zi. Korridori rrugor ndjek itinerarin: Tiranë / Durrës / Vlorë – Elbasan – Shkup – Pernik – Sofje – Plovdiv – Burgas – Varna.

Edhe pse ende i paplotë, ai paralelizohet gjerësisht me linjën hekurudhore.

Autostrada Adriatik-Joniane është një autostradë në ndërtim e sipër, përgjatë bregut perëndimor të Adriatikut dhe detit Jon. Kjo udhë e gjatë përshkon pjesën perëndimore të gadishullit Ballkanik. Është planifikuar që distanca të realizohet si një autostradë e pandërprerë.

Ajo fillon në Trieste (Itali) dhe kalon së pari përmes Sllovenisë për në Rijeka në Kroaci. Në afërsi të Dubrovnikut Autostrada Adriatik-Jon do të kalojë përmes Bosnje-Hercegovinës në Trebinje për në Mal të Zi.

Atje ajo do të vazhdojë përmes Podgoricës dhe do të kalojë nga pjesa veriore te Liqenit të Shkodrës në Shqipëri e me tej për në Durrës në drejtim të Greqisë. Në Greqi kjo autostradë do të kalojë ne Janinë dhe Patra me pikë përfundimtare në Kallamata.

Ky korridor për Kroacinë, Malin i Zi dhe Shqipërinë është shumë i rëndësishëm, por ka pak mbështetje nga Bashkimi Europian. Vendet kanë ndërmarre nisma të brendshme për të mundësuar mbledhjen e kapitalit për realizimin e këtij projekti ndërkombëtar./ Revista Monitor