web counter
LEXO PA REKLAMA!

SHKARKO APP

App Store
Google Play

E fundit!

x

Sëmundja e gazetarit dhe shtrimi në spital/ Rrëfehet nëna e Kastriot Myftarajt

21 Shtator 2022, 16:52, Aktualitet CNA
Sëmundja e gazetarit dhe shtrimi në spital/ Rrëfehet nëna e
Gazetari Kastriot Myftaraj

Nëna e gazetarit Kastriot Myftaraj, që sipas policisë ndërroi jetë pasi u vetëhodh nga kati i katërt i banesës, ka hedhur dyshime të forta për vrasjen e të birit.

Violeta Myftaraj pretendon se djali i saj nuk është vetëvrarë, por është vrarë.

“Të gjithë vdekjen e Kastriotit nuk e kanë quajtur vetëvrasje , por vrasje. Edhe unë si nënë këtë mendoj. Në këtë kohë të tmerrshme ekzistojnë lloj-lloj mënyrash për të vrarë një njeri. Ka dhe nga ata që të hiqen si miq dhe ta futin thikën pas shpine”, u shpreh ajo.

Nëna e të ndjerit ka rrëfyer aludimet e saj dhe veprimet e fundit të gazetarit para se të humbte jetën. Një nga gjërat që ajo thotë se i bën përshtypje, është tema e emisionit të fundit “Ju flet Moska”, ku Kastriot Myftaraj kishte vendosur të fliste për: ‘Plan për atentat ndaj një pronari mediatik’.

“Në fakt, kjo temë më habiti dhe mua dhe të nesërmen e pyeta Kastriotin se ç’qe ajo temë e tillë që fole mbrëmë, por nuk mora përgjigje. Më dt.18 im bir filloi lejen. Sigurisht lejet i jep administratori. Por megjithatë u gëzova, se bënte 5 emisione në javë dhe kishte nevojë të çlodhej, por më bëri përshtypje, se në atë situatë politike të acaruar, të gjithë vazhdonin punonin edhe në televizionet e tjera. Aq më tepër që Kastrioti nuk mund të rrinte dot pa punë. Kjo ishte natyra e tij. Pra ky qe i vetmi që mori lejen”, theksoi ajo për gazetën "Sot".

Më tej, Violeta Myftaraj zbuloi detaje nga marrja e lejes së gazetarit, nga zbulimi i sëmundjes dhe shtrimi në spital.

“Megjithatë, që nga data 18 që mori lejen, dilte çdo dite paradite dhe mbasdite. Nuk kishte asnjë shqetësim, nuk ankohej për asgjë. Më 24 qershor d.m.th. 6 ditë pasi mori lejen, doli si ç’do ditë tjetër, por atë ditë u kthye më herët se ditët e tjera. Pasi bëri dush, hëngri drekë dhe po ecte nëpër shtëpi, gjë që e bënte çdo ditë mbasi hante. Por në një moment, vura re se po mbaheshe nëpër mure.

U ngrita menjëherë dhe e pyeta se çfarë i kishte ndodhur. Në kohën që unë po e pyesja, ai ra në dysheme pa ndjenja. Mbasi e solla në vete duke i lagur fytyrën e ndihmova të ngrihej, por nuk ngrihej dot. Ju luta të mblidhte forcat dhe me ndihmën time u ngjit në shtrat. Pasi erdhi pak në vete, e pyeta se ku kishte qenë dhe me kë ishte, në ç’lokal ishte dhe çfarë kishte pirë? Nuk më tregoi. E kuptova që ishte helmim, barku i lëvizte sikur kishte ndonjë kafshë brenda që donte të dilte.

Mora në telefon tim nip, ai thirri urgjencën, të cilët erdhën menjëherë. E morën me barelë, sepse nuk ngrihej dot. Atje e kishin nxjerrë nga gjendja në të cilën ndodhej dhe e kishin çuar tek spitali 5 në neurokirurgji. Atje i kishin bërë analiza dhe skaner dhe e kishin diagnostikuar me tumor malinjë në tru. Pra tim biri, brenda 6 ditëve që nga 18 qershori, që mori lejen, iu shfaq ky tumor si me magji, pa dhënë më parë as shenjën më të vogël. Veç më 24 qershor na mbiu ky tumor me dy shenja në tru, si ‘një bimë, që mbjell në tokë dhe mbin papritur pa i ardhur koha’.

Aq më tepër që mua si nënë nuk m’u dha asnjë analizë e të vjellave, sepse dyshoja për helmim dhe jo dyshoja, por qe vërtet helmim. Pra gjithçka e ka burimin tek 24 qershori, 6 ditë pasi Kastrioti mori lejen deri më 7 Korrik që vdiq. Pra brenda 13 ditëve im bir ndërroi jetë pa u ankuar për asgjë para këtij 13 ditëshi. Nuk besoj t’i ketë ndodhur ndonjërit që ka vuajtur nga kjo sëmundje që t’i ketë ndodhur kështu. Kastrioti vuante nga gjendja tiroide dhe nuk ishte ankuar asnjëherë për këtë. Deri më 18 qershor ishte shumë aktiv dhe nuk ankohej për asgjë. Bënte 5 emisione në javë, punonte në kompjuter, lexonte dhe nuk shfaqi kurrë lodhje ose ndonjë shqetësim tjetër”, nënvizoi ajo, teksa rrëfen se nuk dinte agjë për sëmundjen e të birit./ B.A. - CNA.al





Lajmet e fundit nga