Nëna e Kastriot Myftarajt zbulon bisedat/ Kush është personi që telefononte çdo ditë gazetarin

21 Shtator 2022, 16:12, Aktualitet CNA

Nëna e Kastriot Myftarajt zbulon bisedat/ Kush është personi

Gazetari Kastriot Myftaraj

Dyshime të forta janë ngritur së fundmi për humbjen e jetës së gazetarit Kastriot Myftaraj, për të cilin policia njoftoi më 7 korrik se mund të jetë vetëvrarë duke u hedhur nga kati i katërt i banesës.

Nëna e gazetarit, Violeta Myftaraj nuk bie dakord me policinë. Në një intervistë për gazetën “Sot”, ajo hodhi dyshime se me vdekjen e të birit mund të ketë lidhje një person me inicialet B.M.

Sipas saj, ky person e telefononte gazetarin çdo ditë në të njejtën orë deri në 24 qershor, 6 ditë pasi Myftaraj filloi lejen.

Violeta Myftaraj deklaroi se sa herë shihte emrin e shtetasit B.M. në telefonin e djalit të saj, kishte një ndjesi të keqe.

“Flitet për vrasje. Po! Disa vrasje bëhen në mënyrë të çuditshme. Ka njerëz që të afrohen si miq por ne fund dalin ndryshe. Para disa ditësh lexova në një portal, të datës 9 Korrik dy dite pas vdekjes se Kastriotit një shkrim për vdekjen e tim biri. Dhe çuditërisht autori i këtij shkrimi ishte B.M. Them çuditërisht, se ky njeri, që kur filloi punë Kastrioti tek televizioni Ora Neës, i është qepur si rrodhe. Nuk kishte ditë që nuk e merrte ne telefon tim bir madje kishte raste edhe disa herë dhe gjithmonë në të njëjtën orë 10 e gjysmë deri me 11 të ditës, në piskun e vapës. Sa herë që binte zilja e telefonit në këtë orë, i cili ishte gjithnjë mbi tavolinë, shfaqej në ekranin e telefonit emri B.M.!

Parandjenjat janë të çuditshme. Nuk e di pse kisha një ndjesi të keqe kur shikoja këtë emër në telefonin e tim biri. Kjo zile, me një tingëllimë aq të fortë, me dukeshe kobndjellëse. Sa herë që binte kjo zile, që dallonte nga gjithë të tjerat, e kuptoja pa e parë, që ishte ajo: “kobndjellësja” e këtij ditëziu. E pyesja tim bir: Cili është ky, pe nga është? Nuk më duket njeri i mirë, i thosha ç’të lidh me të? Aq më tepër që nuk punoni në të njëjtin televizion. Por jo, ai s’i ndaheshe, do ta shpinte deri në fund misionin e tij. Kur të qepet i ligu s’ke ç’i bën. Por çuditërisht këto telefonata vazhduan deri më 24 qershor, 6 ditë mbasi Kastrioti filloi lejen, dhe më 24 qershor u sëmur, siç e kam treguar më lart", theksoi ajo.