Rrënohet shtëpia monument kulture e Pashko Vasës, mbesa e tij ngre alarmin

29 Qershor 2022, 21:26, Aktualitet CNA

Rrënohet shtëpia monument kulture e Pashko Vasës, mbesa e tij

Foto nga emisioni "Stop"

Rajmonda Vasa trashëgimtarja e të madhit Pashko Vasa tregon se dikur priste e përcillte miq e vizitorë të shtëpisë së patriotit që është monument kulture. Por sot shtëpisë i pikon çatia dhe i ka rënë suvaja. Restaurimet e bëra në vitin 2012 dhe 2018 kanë qenë me defekte dhe e kanë kthyer banesën në rrënojë. Rajmonda thotë se ka vënë në dijeni ministren, kryeministrin, por nuk ka marrë përgjigje.

Rajmonda Vasa: Unë ju kam shqetësuar për problemet që ka filluar të ketë kjo banesë dhe që është lënë në harresë nga institucionet. Janë problemet që janë krijuar kohët e fundit nga punët jocilësore. Nuk shoh asnjë përgjigje. Është krijuar lagështirë sepse ka pikuar çatia. Unë ju kam dërguar disa foto që të ngre alarmin se kjo po shembet.

Arkitekti i njohur, Zef Çuni, i cili i ka parë nga afër vetë këto probleme tregon për problemet duke thënë se është e domosdoshme që Ministria e Kulturës të ndërhyjë duke qenë se është edhe 130-vjetori i vdekjes së tij.

Zef Çuni, arkitekt: Është një monument me vlera të jashtëzakonshme, si monument kulture, por edhe si banesë popullore karakteristike shkodrane. Është edhe monument historik, pasi aty ka jetuar Pashko Vasa. Është e domosdoshme që Ministria e Kulturës të ndërhyjë duke qenë se është edhe 130-vjetori i vdekjes së tij. Pushteti lokal nuk u kushton vëmendje këtyre objekteve.

Emsioni “Stop” i është drejtuar Drejtorisë Rajonale të Trashëgimisë Kulturore të qytetit të Shkodrës.

Besara Podgorica, dr. DRTK Shkodër: Aktualisht, projekti ka shkuar në Këshillin Kombëtar të Trashëgimisë Materiale. Ka shkuar për miratim dhe pritet miratimi i tij. Maksimumi, mund të zgjasë 1 muaj nga verifikimi i çështjeve teknike për sa i takon projektit. Ne kemi qenë në kontakt edhe me trashëgimtaren e pronës dhe normalisht që i kemi marrë parasysh të gjitha shqetësimet që ajo i ka adresuar dhe në këtë kuadër ne e kemi futur në planin e veprimit për vitin 2022 në projektet e mirëmbajtjes banesën Pashko Vasa, pavarësisht se aty është investuar disa herë deri në vitin 2018.

Më pas, “Stop” u drejtua në Institutin Kombëtar të Trashëgimisë Kulturore dhe Drejtorisë Rajonale Shkodër ku u tha se do të jepen 10 milionë lekë të vjetër për restaurimin e shtëpisë së patriotit Pashko Vasa.

Inxhinier në DRTK Shkodër: Ministria ka paraqitur dy lloje skemash. Skema e parë ka qenë vetëm pjesa e mirëmbajtjes, maksimumi ministria jep 10 milionë të vjetra, ndërsa skema B ka qenë, nëse objektin do ta kthesh në biznes, ministria mund të financonte deri në 50 milionë lekë të vjetër./tvklan.al