Kurban Bajrami kremtohet në Korçë/ Mesazhe për paqe dhe dashuri

6 Qershor 2025, 14:17, Aktualitet CNA

Në një atmosferë të mbushur me besim e solidaritet, besimtarët myslimanë në qytetin e Korçës kremtuan sot festën e shenjtë të Kurban Bajramit, një nga momentet më të rëndësishme të kalendarit islam.

Qindra qytetarë u mblodhën që në orët e para të mëngjesit në sheshin përpara xhamisë historike të Iljaz Bej Mirahorit, ku u zhvillua falja e Bajramit dhe u përcollën mesazhet e urimit dhe të dashurisë ndërnjerëzore.

Myftinia e Korçës organizoi ceremoninë zyrtare të faljes, e cila u shoqërua me fjalë frymëzuese që nxitën reflektimin mbi vlerat thelbësore të kësaj feste, sakrificën, mëshirën dhe kujdesin për tjetrin.

"Sot është një festë e madhe për mbarë myslimanët e zonës së Korccës dhe për mbarë myslimanët në gjithë botën. Është festa e Kurban Bajramit. Sot nga xhamia e Iljaz Bej Mirahorit në Korccë, ju uroj të gjithë myslimanëve shqiptarë kudo që janë, gëzuar për shumë vjet Kurban Bajramin. Zoti ua pranoftë veprat e mira, sakrificat dhe kurbanet e tyre. Gëzuar!"

Në këtë ditë të veçantë, mesazhet që u dhanë nuk u kufizuan vetëm te aspekti fetar, por u zgjeruan me thirrje për paqe dhe harmoni për të gjithë njerëzimin, me një ndjeshmëri të veçantë për popujt që vuajnë nga konfliktet dhe padrejtësitë. Pjesëmarrësit ndanë gëzimin e kësaj dite me njëri-tjetrin, duke theksuar rëndësinë që ka për ta kjo festë në jetën shpirtërore, familjare dhe komunitare.

"Sot është festa e Kurban Bajramit, sicc e shihni sheshi është plot. Është një ditë gëzimi, harmonie, ditë e përcjelljes së mesazheve pozitive për secilin nga ne. Unë dua të bëj një thirrje e për popullin palestinez të gjejë paqen sa më parë sepse të gjithë duhet të jetojmë në paqe, harmoni e dashuri."

"Sot besimtarët myslimanë festojnë Kurban Bajramin. Në këtë ditë të shënuar dua të bëj një urim për të gjithë shqiptarët, gëzuar për shumë vjet festën e Kurban Bajramit."

"Është dita e Kurban Bajramit, të gjithë besimtarët myslimanë festojnë. Uroj për paqe e lumturi në familjet e tyre dhe gjithë të mirat në këtë jetë."

Një vend të veçantë në këtë ditë zënë edhe gratë besimtare, të cilat shprehën mirënjohjen dhe gëzimin që ndajnë me familjet e tyre. Ato theksuan se kjo festë përfaqëson një moment falënderimi për të gjitha të mirat dhe një mundësi për t’u afruar më shumë me Zotin përmes lutjes dhe besimit të sinqertë.

"Festojmë Kurban Bajramin. Gëzuar festën. Besimtarëve i uroj gëzuar, vit të mbarë e suksese, dashuri e gëzim në përjetësi."

"Sot është dita e Kurban Bajramit. Jam shumë e kënaqur që jam e drejtë, e verbër dhe më ka mbajtur zoti mirë ngaqë besoj shumë. Kjo ditë është shumë e rëndësishme, ai që beson zoti e ndihmoftë. Faleminderit o zot! Të na falë e të na japë bekime kudo që shkojmë."

Kurban Bajrami nuk është vetëm një ditë feste, por një ditë që përçon mesazhe të forta për shoqërinë. Të kujdesemi për njëri-tjetrin, të ndihmojmë ata që kanë më pak, të falim dhe të ndërtojmë ura mirëkuptimi. Në shumë familje myslimane të Korçës, sot u ther kurbani, duke ndarë mishin me fqinjët, të afërmit dhe njerëzit në nevojë, një akt simbolik që shpreh shpirtin e vërtetë të kësaj dite./ CNA