web counter
LEXO PA REKLAMA!

SHKARKO APP

App Store
Google Play

E fundit!

x

Kumbaro inspekton dyqanet në Durrës/ Thirrje për qytetarët: Përdorni trastat!

30 Qershor 2022, 20:37, Aktualitet CNA
Kumbaro inspekton dyqanet në Durrës/ Thirrje për qytetarët:
Mirela Kumbaro, Durrës

Ministrja e Turizmit dhe Mjedisit, Mirela Kumbaro, e shoqëruar nga kryetarja e Bashkisë Durrës, Emiriana Sako, vëzhgoi nga afër procesin e zbatimit të ligjit që ndalon qeset plastike mbajtëse njëpërdorimshe. 

“I gjithë qëllimi është që t’i dekurajojmë njerëzit nga blerja e qeseve. Këto qese që ju tregtoni janë në përputhje me ligjin sepse janë të trasha dhe shumëpërdorimëshe. Më vjen mirë që ju keni futur edhe qeset e letrës, por nga data 1 korrik, kontrollet nuk do të jenë më vetëm informuese, por edhe me masa ndëshkimore”, u shpreh ministrja gjatë bisedës me një tregtuese në një market ushqimor.

Ndërsa bisedoi nga afër me subjektet tregtare dhe qytetarët, ministrja dhuroi edhe çanta tekstili duke i porositur që t’i mbajnë me vete sa herë bëjnë pazare që të mos paguajnë për qeset shumëpërdorimëshe me trashësi 70 mikronë dhe kapacitet mbajtës 10 kilogramë. Edhe pse këto të fundit janë konform ligjit, përdorimi i çantave të tekstilit, sipas ministres Kumbaro, është alternativa më e mirë për të mbrojtur mjedisin.

“Po, mund të blihen qeset e trasha, por ajo që ne sugjerojmë është përdorimi i trastave”, tha Kumbaro.

 Gjatë takimit, ministrja shpjegoi se pas një muaji sensibilizimi, të tria subjektet kontrolluese të zbatimit të ligjit që parashikon ndalimin e prodhimit, importimin dhe tregtimin e qeseve plastike mbajëse njëpërdorimshe, që janë Drejtoria e Doganave, Agjencia Kombëtare e Mjedisit dhe Inspektorati i Tregut, nga data 1 korrik do të nisin me vendosjen e sanksioneve. 

Në një prej supermarketeve të qytetit bregdetar, kryetarja e bashkisë, Emiriana Sako prezantoi edhe projektin e ri të koshave që do të shërbejnë për të hedhur ambalazhet e kartonit të këtyre subjekteve. Në këtë mënyrë, nuk tejmbushen koshat e qytetarëve dhe nga ana tjetër, duke mos u përzier me mbetje të tjera, ato nuk kontaminohen duke u dhënë mundësi subjekteve ricikluese t’i përdorin./E.T-CNA.al





Lajmet e fundit nga