web counter
LEXO PA REKLAMA!

SHKARKO APP

App Store
Google Play

E fundit!

x

Komisioneri për të Drejtën e Informimit i jep të drejtë CNA-së/ Urdhëron RTSH-në të japë informacionin e fshehur

7 Mars 2024, 14:59, Aktualitet CNA
Komisioneri për të Drejtën e Informimit i jep të drejtë
Fotomontazh - Alfred Peza dhe Leka Bungo

CNA, prej disa javësh ka denoncuar abuzimet në Festivalin e 62-të të Këngës në Radio Televizionin Shqiptar, i cili prej gati një viti drejtohet nga Alfred Peza.

CNA publikoi dokumente që tregonin se si ishin shpenzuar rreth 140 milionë lekë më shumë në krahasim me edicionin e kaluar, ishin shtuar paratë për mjete me qira, paratë për këngët konkurruese, pagesat për të ftuarit dhe për skenografinë.

Nga dokumentet rezultonte se të ftuarit dhe mjetet me qira kapnin afërsisht shifrën 200 milionë lekë, mbi 30% të vlerës totale të shpenzimeve.

CNA nuk u ndal vetëm këtu, por për shpenzimet e Festivalit të Këngës iu drejtua me tri shkresa zyrtare kreut të RTSH-së, drejtorit Alfred Peza dhe kryetarit të Këshillit Drejtues të RTSH-së, zotit Leka Bungo.

Komisioneri për të Drejtën e Informimit i jep të drejtë
Leka Bungo dhe Alfred Peza

Kërkesat kishin disa pyetje të thjeshta dhe të qarta: Kur u miratua buxheti i vitit 2023? Sa ishte fondi për Festivalin dhe a kishte pasur ndryshime apo rishikim të buxhetit? Sa ishte shuma e propozuar nga Peza? Sa propozime bëri Peza për Festivalin dhe sa është vlera e tyre? Sa ka kushtuar Festivali i 62-të i Këngës në RTSH?

Këto janë pyetje legjitime, pa kurrfarë rreziku, nëse gjithçka ka qenë konform ligjit, ndaj nuk e prisnim refuzimin, madje-madje mosdenjimin e kthimit të përgjigjes as nga z. Peza e as nga z. Bungo, të paktën për dy nga kërkesat tona zyrtare.

Një përgjigje refuzuese na erdhi nga drejtori Peza, i cili na bënte me dije se nuk mund të na vinte në dispozicion informacionin e kërkuar prej nesh etj., pa referuar asnjë bazë ligjore dhe duke “harruar” se informacioni duhej të ishte bërë publik, pasi fondet e RTSH-së janë publike dhe kjo detyron transparencën.

Në kushtet e heshtjes edhe pas kërkesës së tretë që CNA u adresoi Pezës e Bungos, të detyruar, në shkurt, i adresuam ankesë Komisionerit për të Drejtën e Informimit dhe Mbrojtjen e të Dhënave Personale, i cili i jep të drejtë CNA-së, ndërsa ua bën të qartë drejtorit të Përgjithshëm, Alfred Peza, dhe kryetarit të Këshillit Drejtues, Leka Bungo, se vënia në dispozicion e të dhënave të kërkuara nga CNA është e drejtë ligjore, refuzimi akt antiligjor.

“Pas shqyrtimit paraprak të ankesës, sjellim në vëmendjen tuaj se pika 3 e nenit të ligjit nr. 119/2014, ‘Për të drejtën e informimit’, i ndryshuar (në vijim LDI), parashikon se: “Çdo person ka të drejtë të njihet me informacionin publik, nëpërmjet dokumentit origjinal, ose duke marrë një kopje të tij në formën ose formatin që mundëson akses të plotë në përmbajtjen e dokumentacionit”, citohet në shkresën e Komisionerit Publik drejtuar titullarëve të RTSH-së, Peza e Bungo, që vijon:

“Gjithashtu, bazuar në pikën 2 të nenit 2 të LDI parashikohet se: ‘informacion publik’ është çdo e dhënë e regjistruar në çfarëdolloj forme dhe formati, gjatë ushtrimit të funksionit publik pavarësisht nëse është përpiluar ose jo nga autoriteti publik. Në këtë kuptim, Autoriteti Publik duhet të vendosë në dispozicion të kërkuesit çdo informacion, dokument, i cili është prodhuar ose mbahet nga ky i fundit në formën e zotëruar”, shkruhet ndër të tjera në shkresë-përgjigjen që Komisioneri për të Drejtën e Informimit, i ka kthyer City News Albania-s.

Pra, Komisioneri për të Drejtën e Informimit, përveçse mbështet CNA-në në të drejtën e vet si media, urdhëron RTSH-në të japë informacionin e fshehur.

Komisioneri për të Drejtën e Informimit i jep të drejtë
RTSH

Kjo, pasi fshehja e qëllimshme e informacionit ngre edhe më tepër dyshime për abuzime. E në vend të një përgjigjeje zyrtare me të dhëna, CNA është përballur me sulme, shpifje dhe fyerje.

Dhe këto sulme banale dhe të pështira erdhën nga Leka Bungo, i cili, në mos është bashkëpunëtor i Alfred Pezës, është miratues i “masakrës” së tij në RTSH.

Leka Bungo në vend të një përgjigjeje për shifrat e Festivalit të Këngës që ndryshojnë nga 466 në 600 milionë lekë, hedh sulme mbi CNA-në.

Në vend të një përgjigjeje për shkarkimet masive si kryetar i Bordit Drejtues, hedh vrer mbi CNA-në vetëm e vetëm se i drejtuam disa pyetje të thjeshta e të drejta.

CNA thekson edhe njëherë se nuk do të intimidohet nga sulmet që i vijnë nga Leka Bungo, por do të vijojë të denoncojë abuzimet në RTSH dhe do të luftojë për zbardhjen e së vërtetës./ CNA

Komisioneri për të Drejtën e Informimit i jep të drejtë

Komisioneri për të Drejtën e Informimit i jep të drejtë





Lajmet e fundit nga