Kuvendi, rezolutë për mostransparencë financiare në RTSH

26 Qershor 2023, 21:10, Aktualitet CNA

Ndonëse paguhet me taksat e qytetarëve dhe merr miliona euro çdo vit nga pagesa e tarifës në librezën e dritave, Radio Televizioni Shqiptar ( RTSH) është kthyer në "bunker" që fsheh veprimtarinë financiare me të cilën mbulohen aktivitetet e tij të përditëshme. Mungesa totale e transparencës ka sjellë faktin që askush nuk di të thotë se kush firmos dhe çfarë firmos, sa kushtojnë dhe ku shkojnë miliardat e fondeve të përvitshme që ky përbindësh mediatik shpenzon çdo vit e që dalin nga portofolet e miliona shqiptarëve e derdhen te Buxheti i Shtetit në formën e taksës për RTSH-në.

Vijimësia e këtij avazi që vijon prej tre dekadash duke mbjellë shpërdorime, përvetësime, abuzime, etj, nëpërmjet aferave korruptive, ca të publikura në media e shumica mbetura të fshehura, ka zgjuar më në fund Parlamentin që ka hartuar një rezolutë të adresuar RTSH-së, nëpërmjet të cilës kërkon informacion të detajuar mbi mbulimin financiar të aktiviteteve. Sipërmarrja e Kuvendit vjen pasi më parë janë konstatuar shumë problematika, që vërtetojnë se nga institucioni në shërbim të publikut që e financon, RTSH është kthyer në një institucion qokash, që strehon militantët e tarafët, ku vendet e punës blihen kundrejt dhënies së pareve nën dorë dhe nuk ka fare transparencë mbi vendimmarrjet.

"Këshilli Drejtues i RTSH-së të informojë sa më parë Kuvendin në lidhje me prodhimet e porositura gjatë vitit 2022 nga fondi i prodhimit të pavarur. Të bëhet transparente veprimtaria e KDRTSH në faqen zyrtare online duke u publikuar të gjitha vendimet e marra të shoqëruara edhe me relacionet përkatëse, procesverbalet e mbledhjeve dhe mënyrën e votimit. Të bëhet transparente përbërja dhe veprimtaria e Bordit të Administrimit, duke publikuar aktivitetin e këtij bordi dhe të gjithë vendimet e marra dhe aktet e miratuara. Të bëhet transparente përbërja dhe veprimtaria e Këshillit për shikuesit dhe dëgjuesit si dhe të publikohen të gjitha vendimet e tij”, janë disa prej kërkesave që Parlamenti ia ka adresuar RTSH-së.

Po ashtu, një tjetër kërkesë e adresuar nga Kuvendi është mungesa e transparencës mbi shpenzimet për festivalet. RTSH ka zhvilluar shumë evente muzikore, por kurrë nuk është marrë vesh se sa është paguar për to. Kuvendi ka kërkuar që të bëhet transprencë sa më e hollësishme dhe sa më e shpejtë.

Po ashtu nëpërmjet rezolutës, Kuvendi kërkon që në kuadër të transparencës të publikohet në faqen zyrtare struktura organizative dhe organika e RTSHsë, të reflektohen vakancat e krijuara dhe të jetë transparente e gjithë procedura e rekrutimit.

Si afat kohor për ezaurimin e pikave të rezolutës Parlamenti ka vendosur periudhën brenda e mbetur të këtij viti./ CNA.al