"Kisha është munduar që të mos përzihet"/ Fortlumturia e Tij Joani tregon raportet me politikën

23 Tetor 2025, 09:48, Aktualitet CNA

"Kisha është munduar që të mos përzihet"/

Kryepiskopi i Tiranës, Durrësit dhe gjithë Shqipërisë, Fortlumturia e tij, Joani, në intervistën e tij në emisionin “Opinion”, është pyetur për raportet e tij me politikën.

Fortlumturia e Tij, Joani, deklaroi se fillimisht duhet të bëhet dallimi mes politikës dhe partive politike.

Sa i përket politikës, Kryepiskopi tha se për sa kohë jetojmë në qytet të gjithë jemi të përfshirë në politikë.

Ndërsa në kuptimin partiak, Fortlumturia e Tij u shpreh se kisha është munduar të mos përfshihet në kuptimin partiak, pasi në Kishë ka besimtarë nga të gjitha partitë.

Fevziu: Cilat janë raportet tuaja me politikën?

Kryepiskopi: Duhet të kuptojmë këtë gjë se nganjëherë këtu ngatërrohet politika me partitë vetëm. Edhe etimologjia e fjalës politikë vjen nga polis i qytetit.

Fevziu: Po, patjetër.

Kryepiskopi: Gjersa jetojmë në qytet, të gjithë jemi përfshirë në njëfarë politike, të gjithë. Po jo partiake.

Fevziu: Po njeriu është qenie politike. Politika zgjedh gjithçka, jetesën e përditshme, gjithë kjo është.

Kryepiskopi: Në kuptimin partiak, se nganjëherë këtu politika kuptohet vetëm në kuptimin partiak. Kisha është munduar që të mos përzihet në kuptimin partiak. Sepse ne në kishë kemi besimtarë nga të gjitha partitë. S’jemi ne që mund t'i caktojmë voto për këtë parti, mos voto për partinë tjetër. Dhe raporti që duhet të mbajmë ne me autoritetet lokale duhet të jetë gjithmonë një raport bashkëpunimi, duke ruajtur pavarësitë e të dyja palëve, se nuk do t'i urdhërojmë ne se çfarë do të bëjnë. Shpeshherë ne mund të japim mendimin tonë, po jo se do t'i urdhërojmë. Por, ata janë zgjedhur nga vetë populli, nuk jemi ne që i zgjedhim. Ne respektojmë atë që populli zgjedh. Kushdo që të jetë për shembull i zgjedhur në bashki, atë respektojmë. Kështu ka qenë vazhdimisht dhe kështu duhet të jetë, se nuk e caktojmë ne atë se kush do jetë./CNA