Një rrëfim ndryshe i Kryepiskopit Joan/ Fortlumturia e Tij: Jam rritur në një lagje ku respekti për njeriun ishte i lartë

22 Tetor 2025, 22:15, Aktualitet CNA

Një rrëfim ndryshe i Kryepiskopit Joan/ Fortlumturia e Tij: Jam rritur

Kryepiskopi i Tiranës, Durrësit dhe gjithë Shqipërisë, Fortlumturia e Tij, Joani, po zhvillon mbrëmjen e sotme një intervistë në emisionin “Opinion” të gazetarit Blendi Fevziu.

Fortlumturia e Tij ka folur për fëmijërinë dhe ka treguar kujtimet e tij në një kohë që feja ishte e ndaluar në Shqipëri. Kryepiskopi është shprehur se për herë të parë kur ishte fëmijë ishte futur në një Kishë në qendër të Tiranës, ku tregoi se sapo hyje brenda të krijohej ndjesia sikur hyje në botë tjetër.

Ai ka rrëfyer se është rritur në një lagje të Tiranës ku respekti për njeriun ishte i lartë dhe asnjë shtëpi nuk kishte çelës. Ai ka treguar se ka jetuar në atë lagje deri në moshën 20-vjeçare.

“Padyshim që ishte një periudhë jo e lehtë. Sa ishim të vegjël dhe fëmijë, ndoshta nuk e kuptonim dot të gjithë shtypjen. Shumë pak. Mbaj mend njëherë një komshija jonë na mori së bashku me disa fëmijë të tjerë, dhe ishin Pashkët, kam qenë shumë i vogël, te kisha në qendër, ku sot është hotel Tirana.

Ai imazhi më ngeli gjithmonë në mendje, kisha, qirinjtë, ikonat, temjani, veshja e klerikëve, etj., të gjitha këto krijonin një lloj ndjenje të një bote tjetër. Po si kemi biseduar edhe disa objekte ne atë kohë, ndonjë teqe, xhamia ty afër, se unë jam rritur te Rruga Qemal Stafa, jo shumë larg shkollës së kuqe.

Kur kaluam në lagje tjetër, kuptuam që ajo lagje ishte e veçantë, kishin respekt për njeriun, madje habitem qe nuk na kanë arrestuar. Ishte një rrugicë qorre, asnjë shtëpi nuk kishte çelës, hynim në shtëpitë e njeri tjetrit, luanim.

Kur ndryshuam lagjen, ishim të rritur, po besoj në Tiranë si kudo në Shqipëri, kishin një marrëdhënie, por jo si te lagjia në Shkollën e Kuqe. Në atë lagje isha deri në moshën 20 vjeçare, ku mora formimin më të plotë, se formimi është proces i vazhdueshëm”, është shprehur Fortlumturia e Tij. /CNA