web counter
LEXO PA REKLAMA!

SHKARKO APP

App Store
Google Play

Fatura të falsifikuara dhe subjekte fantazmë/ Skema e të “moshuarve milionerë” përsëritet në inceneratorin e Tiranës

8 Gusht 2023, 14:12, Aktualitet CNA
Fatura të falsifikuara dhe subjekte fantazmë/ Skema e të
Inceneratori i Tiranës

Skandalet me aferën e inceneratorëve nuk kanë të ndalur. Njerëzit e inceneratorëve, Mirel Mërtiri dhe Klodian Zoto, të konfirmuar “de facto” si pronarë të inceneratorit të Tiranës nga SPAK kanë përdorur skemën e falsifikimit të faturave për të gllabëruar mbi 400 milionë lekë të rinj.

Mërtiri dhe Zoto kanë përdorur të njejtën skemë si me Elbasanin dhe Fierin, që u denoncua një vit më parë nga deputetja Monika Kryemadhi. Bëhet fjalë për skemën me të moshuarit, të cilët rezultuan papritur milionerë dhe me biznese në emër të tyre.

Në dokumentet e SPAK, të dërguara Gjykatën e Posaçme të Shkallës së Parë, rezultojnë subjekte fantazmë që pretendohej se kryenin shërbime për inceneratorin e Tiranës, por që në fakt, sipas SPAK, përmbajnë rrethana e fatura të rreme.

Në faqen 18, 19, 20, 21 dhe 22 të dokumentacionit të Prokurorisë së Posaçme përmenden disa qytetarë, Lumturie Murati, Dritan Frangaj, Santiliano Çifliku dhe Emiljano Frroku, të cilët janë “viktima” të dokumenteve të falsifikuara.

Qytetarët e sipërpërmendur, rezultojnë administratorë dhe ortakë të vetëm të subjekteve fantazmë. Ata kanë dëshmuar para hetuesve se nuk kanë bashkëpunuar asnjëherë me Klodian Zoton dhe Mirel Mërtirin për asnjë shërbim, madje nuk kanë drejtuar apo punuar në ndonjë nga shoqëritë e përmenduara nga dokumentet e falsifikuara.

Hetimet e SPAK:

Le t’i marrim një nga një të gjitha rastet.

Nga hetimet e SPAK, në emër të shoqërisë “Lumi 06”, që në dokumentet e falsifikuara rezulton se është administratore Lumturie Murati, për një periudhë kohore prej 12 muajsh janë lëshuar fatura të falsifikuara në drejtim të kompanisë “Integrated Technology Services” të Klodian Zotos në vlerën mbi 109 milionë lekë. Faturat janë lëshuar për periudhën tetor-dhjetor 2018.

Fatura të falsifikuara dhe subjekte fantazmë/ Skema e të

 

Në lidhje me rastin, në faqen 19 të akuzës, vetë e moshuara Lumturije Murati ka deklaruar se nuk ka themeluar ndonjë operator ekonomik me emrin “Lumi 06” dhe nuk ka dijeni se kush e ka themeluar apo regjistruar atë në organet kompetente.

Fatura të falsifikuara dhe subjekte fantazmë/ Skema e të

Klodian Zoto dhe Mirel Mërtiri kanë vazhduar me të njëjtën skemë me një tjetër qytetar.

Në dosjen e SPAK nënvizohet nëpërmjet shoqërisë “AA-117”, me administratore Drita Frangaj janë paraqitur fatura shitjeje të falsifikuara në drejtim të kompanisë “Integrated Technology Services” të Klodian Zotos në vlerën mbi 117 milionë lekë gjatë periudhës gusht-dhjetor 2018.

Fatura të falsifikuara dhe subjekte fantazmë/ Skema e të

Gjithçka është një skemë mashtrimi, pasi zonja Frangaj, sipas SPAK, nuk ka pasur asnjë lidhje me aferën e inceneratorëve.
Por, pronarët “de facto” të inceneretorit të Tiranës, nuk u ndalën.

SPAK nënvizon se në emër të shoqërisë “Al-BerCo&Co”, me administrator Santiliano Çifliku janë paraqitur fatura shitje të falsifikuara në drejtim të kompanisë “Integrated Technology Services” të Klodian Zotos në vlerën mbi 110 milionë lekë. Vetë Santiliano Çifliku thekson në dëshminë e tij se nuk ka themeluar shoqërinë “Al-BerCo&Co, nuk ka qenë i punësuar tek kjo shoqëri dhe nuk ka kryer ndonjë aktivitet tregtar në emër të kësaj kompanie. Ai shprehet se ia ka dhënë ID-në një miku të tij vetëm njëherë, por nuk e di se për çfarë mund ta ketë përdorur.

“Viktima” e 4 e gllabërimit të parave nga Zoto dhe Mërtiri është Emiljano Frroku.

Për periudhën nga gushti deri në dhjetor 2018 në emër të shoqërisë “EZ&LA” janë paraqitur fatura të falsifikuara në drejtim të kompanisë “Integrated Technology Services” të Klodian Zotos në vlerën mbi 71 milionë lekë.

Subjektet, të cilat pretendohet se kanë kryer punime dhe kanë shitur mallra për llogari të kompanisë “ITS” të Klodian Zotos, sipas SPAK nuk kanë kapacitete në burime njerëzore dhe në mjete për të ushtruar aktivitetin tregtar dhe si rrjedhojë nuk mund të faturojnë në volumet e deklaruara në faturat e shitjes. Gjithashtu, SPAK thekson se pjesë e kësaj skeme mashtrimi janë bërë pjesë edhe dhjetra persona të punësuar në të katër subjektet.

Fatura të falsifikuara dhe subjekte fantazmë/ Skema e të

Personat që rezultojnë të punësuar janë të deklaruar si të punësuar në disa shoqëri njëkohësisht në shërbime të ndryshme.
Nga dokuemtacioni i adrministruar rezulton se këta shtetas kanë qenë të punësuar realisht në subjekte të tjera dhe nuk kanë punuar asnjëherë në 4 shoqëritë e sipërpërmendura.

Sipas SPAK, Klodian Zoto në bashkëpunim me Mirel Mërtirin kanë përfituar në total nga këto faturat tatimore të falsifikuara mbi 400 milionë lekë të rinj. Nga hetimet ka rezultuar se shumat e parave janë tërhequr cash nga Zoto dhe Mërtiri dhe janë dërguar jashtë vendit.

Fatura të falsifikuara dhe subjekte fantazmë/ Skema e të

 





Lajmet e fundit nga