web counter
LEXO PA REKLAMA!

SHKARKO APP

App Store
Google Play

Ekskluzive/ Gazetari i paguar nga inceneratorët takon Mirel Mërtirin në Vjenë

29 Dhjetor 2022, 11:44, Aktualitet CNA
Ekskluzive/ Gazetari i paguar nga inceneratorët takon Mirel Mërtirin
Mirel Mertiri (Foto montazh)

Afera e inceneratorëve, vazhdon të jetë një nga ngjarjet më të rëndësishme korruptive, investigative dhe politike të vitit 2022.

I filluar shumë vite më parë si një raportim i një investimi që dikush e quajti aferë korruptive, dikush tjetër një skandal, pasi inceneratorët nuk ishin një zgjidhje e duhur për Shqipërinë e të tjera si këto.

Në vitin 2022, gjërat morën një kthesë të fortë, u ngrit një komision hetimor parlamentar dhe SPAK-u hetoi fort inceneratorët pas denoncimeve të bëra nga Nisma Thurje, Partia Demokratike dhe LSI-ja, në lidhje me inceneratorin e Elbasanit dhe Fierit.

Habilaj takohet me Mirel Mërtirin që është në kërkim dhe njihet si truri i inceneratorëve. 


CNA.al ka mësuar se Endrit Habilaj, pra ky personazh i lidhur fort me inceneratorët së fundmi ka udhëtuar dje në Vjenë.

Udhëtimi është bërë dje dhe pritet që Habilaj të kthehet sot.

CNA.al ka mësuar se Habilaj është takuar në Vjenë me Mirel Mërtirin.

CNA.al ditë pas dite ka zbuluar jo vetëm se kush ishin personat e përfshirë në aferën e inceneratorëve, si Klodian Zoto, Mirel Mërtiri dhe Stela Gugallja, kompanitë e tyre zinxhir dhe shumë persona të përfshirë dhe një ministër i arrestuar, Lefter Koka, që ndodhet në qeli apo edhe Alqi Bllako, sekretari i tij i përgjithshëm,  apo edhe shumë zyrtarë të ndryshëm institucionesh që kishin firmosur për inceneratorët. Këto vetëm për inceneratorin e Elbasanit dhe Fierit.

Hetime ka edhe për inceneratorin e Tiranës, por ato janë ende në zhvillim.

Ndërkohë, i gjithë grupi i pronarëve apo i zbatuesve është shpallur në kërkim përfshirë këtu edhe administratorë si Ariola Kodra dhe Giuseppe Ciaffaglione, i cili figuron administrator dhe aksioner te landfilli i Tiranës, ku duhej të kishte incenerator, por që mungon.

Ekskluzive/ Gazetari i paguar nga inceneratorët takon Mirel Mërtirin
Mirel Mërtiri, Giuseppe Ciaffaglione dhe të tjerë

Mediat bashkëpunëtore në aferën e inceneratorëve

CNA.al ka raportuar edhe mediat, të cilat i kemi quajtur bashkëpunëtore në këtë aferë korruptive që nga “Top Channel”, “Report”-i, “News 24”, FAX NEWS etj si mediat kryesore në vend e shumë portale.

Por ajo që binte në sy është një individ.

Endrit Habilaj, i cili ka hapur rreth pesë kompani dhe merrte para në mënyrë të vazhdueshme nga inceneratorët, të cilët i kemi treguar me fatura.

Ekskluzive/ Gazetari i paguar nga inceneratorët takon Mirel Mërtirin
Endrit Habilaj

Pagesat janë bërë nga inceneratori i Tiranës, ndërkohë që Habilaj ishte në atë kohë gazetar në “Top Channel”, punonte në televizionin “Top News”, gazetar në gazetën “Shqip”, si dhe realizonte emisionin “Top Story”, ku ka bërë me dhjetëra e dhjetëra lajme, ku nënvizohej se sa të mirë ishin inceneratorët dhe çfarë investimi serioz ishte ky, megjithëse tashmë përfundoi në një aferë korruptive.

Me kompanitë “VOX TV”, “Infinit Communication”, dhe SH.Q.I.P, Endrit Habilaj ka marrë para në mënyrë të vazhdueshme nga pronarët e inceneratorëve, Klodian Zoto dhe Mirel Mërtiri.

Me anë të kompanisë “VOX TV”, Endrit Habilaj ka marrë 979 949 lekë të rinj.

Me kompaninë “Infinit Communication”, Endrit Habilaj, ku është ortak me Ornela Pangon, ka marrë 1 774 872 lekë të rinj, ndërsa me kompaninë tjetër, SH.Q.I.P, sipas faturave të siguruara nga CNA.al, kanë dhënë rreth 20 000 euro.

Në total për vitin 2021, Habilaj është paguar nga inceneratorët 2 847 079 lekë.

Tani Habilaj takohet me Mirel Mërtirin që është në kërkim, ndërkohë SPAK dhe policia e kërkojnë.

CNA.al ka mësuar se Habilaj është takuar në Vjenë me Mirel Mërtirin.

Ekskluzive/ Gazetari i paguar nga inceneratorët takon Mirel Mërtirin

Gjithashtu në Vjenë ndodhet edhe Stela Gugallja, bashkëjetuesja e Mirelit dhe fëmijët e tyre të regjistruar në kolegj. Gogallja është shpallur në kërkim nga SPAK-u për inceneratorin e Elbasanit, i cili quhet një aferë korruptive nga SPAK-u, një grup në bashkëpunim që siç e përmendëm më lart janë përfshirë edhe zyrtarë të lartë të shtetit shqiptarë, ku Mërtiri përmendet si "truri".

Tashmë Habilaj i paguar dje, por edhe sot nga inceneratorët, duket qartë se është një nga njerëzit kryesorë, bashkëpunëtor dhe çelësi mediatik dhe propagandues i kompanive të inceneratorëve. Endrit Habilaj është zëdhënësi zyrtar i tyre, njeriu që ndërton strategjitë për propagandën e lajmeve, e cila bëhet jo thjesht dhe vetëm në një portal të tij hapur së fundmi, por edhe në televizione kombëtare apo portale të tjera anonime, të cilat kryesisht përdoren për sulme dhe akuza duke mbrojtur në mënyrë të drejtpërdrejtë aferën e inceneratorëve dhe duke tentuar që gjithçka gati të kalojë politike apo të përfundojë si një evazion fiskal.

CNA.al ka mësuar se Habilaj ndodhet në Vjenë ku u takua gjerë e gjatë me Mirel Mërtirin, i cili ndodhet në Vjenë me bashkëjetuesen e tij Stela Gugallja, ka kërkuar strehim politik.

Qartazi i gjithë skenari i javëve të fundit i bërë në “Top Channel” dhe në disa media të tjera ka pasur një qëllim, garantimin e Mirel Mërtirit dhe strehimin e tij politik në Vjenë, më pas jeta vazhdon e qetë.

Beteja ka qenë e qartë, luftë ndaj drejtësisë për të hequr prokurorët për të zbutur akuzat dhe nga ana tjetër përballje frontale për të bërë të mundur sigurimin e një strehimi politik në Vjenë.

Tashmë nuk ka më kuriozitete, s’ka më të panjohura thjesht dhe vetëm pritet kthimi i Endrit Habilajt dhe më pas të shohim se çfarë lajmesh do të fabrikohen, do të prodhohen dhe do të dëgjojmë në ditët në vijim të dirigjuara nga orkestra simfonike e Mirel Mërtirit me qendër të fshehtë në Vjenë, por që simfonia i luhet në Tiranë.

SPAK tashmë ka në dorë të tjera prova të forta për lidhjet korruptive të medias dhe gazetarëve me bandën e inceneratorëve./ CNA.al





Lajmet e fundit nga