Dënohet me burg "simotra" e Ajola Xoxës në Amerikë

2 Tetor 2025, 12:14, Aktualitet CNA

Gruaja e ish-senatorit amerikan Robert Menendez, Nadine Menendez, është dënuar me katër vjet e gjysmë burg për ndihmë ndaj burrit të saj në një skemë ryshfeti që përfshinte shuma të mëdha parash, shufra ari dhe një "Mercedes-Benz".

Nadine Menendez, 58 vjeçe, u dënua në prill për 15 akuza, përfshirë ryshfet, pasi juria zbuloi se ajo vepronte si një urë lidhëse mes burrit të saj dhe zyrtarëve egjiptianë, duke përcjellë mesazhe dhe duke organizuar takime.

Burri i saj u dënua vitin që shkoi me 11 vjet për skemën që çoi gjithashtu në humbjen e tij politike. Prokurorët e kishin përshkruar atë si të domosdoshme për komplotin.

Në kohën e skemës, Robert Menendez ishte demokrati me gradën më të lartë në Komitetin e Senatit për Marrëdhëniet me Jashtë, një rol i fuqishëm që i dha atij ndikim të rëndësishëm mbi politikën e jashtme të SHBA-së.

Prokurorët thanë se çifti shfrytëzoi pozicionin e tyre për të ndihmuar fshehurazi interesat e qeverisë egjiptiane në Uashington. Ata kishin kërkuar një dënim prej të paktën shtatë vjetësh për Nadine Menendez.

Por gjyqtari i Distriktit Jugor të New York-ut, Sidney H Stein, e dënoi atë me 54 muaj burg, duke thënë se dënimi me burg ishte i rëndësishëm për të penguar të tjerët nga kryerja e mundshme e krimeve të ngjashme.

Një kontroll i FBI-së në vitin 2022 në shtëpinë e çiftit në New Jersey zbuloi shufra ari me vlerë më shumë se 100.000 dollarë dhe qindra mijëra dollarë cash, brenda në zarfe ose të fshehura në rroba.

Së bashku me këto prova, prokurorët federalë i treguan jurisë edhe tekste të mesazheve midis çiftit dhe bashkëpunëtorëve të tyre, si dhe një kërkim në Google, nga ish-senatori që pyeste: "Sa vlen një kilogram ari?

Rasti "Ajola Xoxa"

Skema e çiftit Menendez është pothuajse e njëjtë me skemën e çiftit Veliaj-Xoxa.

Erion Veliaj duke përfituar nga detyra e tij si kryebashkiak i Tiranës firmoste dhe kalonte para tek OJF-të e Ajola Xoxës dhe familjarëve të saj.

Një skemë korruptive galopante, e cila u hetua nga SPAK-u dhe pas hekurave shkoi Erion Veliaj, i cili tashmë u shkarkua dhe nga detyra e tij si kryebashkiak.

Erion Veliaj u arrestua më 10 shkurt, ndërsa ndaj Ajola Xoxës fillimisht u vendos masa arrest shtëpie, ndërsa më pas u la në masën detyrim me paraqitje për shkak të fëmijës së tyre të mitur.

Erion Veliaj ka 13 akuza për 5 vepra të rënda penale si korrupsion, shpërdorim detyre, fshehje të pasurisë, pastrim i produkteve të veprës penale dhe futja e sendeve të ndaluara në qeli.

Nga ana tjetër Ajola Xoxa akuzohet për korrupsion, fshehje pasurie, pastrim të produkteve të veprës penale.

CNA ka publikuar prej kohësh të gjitha skemat korruptive të çiftit Veliaj dhe familjarëve të tyre në shkrimet të cilat mund t’i gjen në linqet e mëposhtme./ CNA