web counter
LEXO PA REKLAMA!

SHKARKO APP

App Store
Google Play

E fundit!

x

BE-ja pajtohet të ndalojë shumicën e importeve të naftës ruse

31 Maj 2022, 10:35, Aktualitet CNA

BE-ja pajtohet të ndalojë shumicën e importeve të

Udhëheqësit e Bashkimit Europian ranë dakord të hënën vonë të ndalojnë dy të tretat e importeve të naftës ruse, si pjesë e një marrëveshjeje kompromisi për të rritur trysninë ndaj Rusisë, duke marrë parasysh efektet ekonomike në disa vende të bllokut që varen më shumë nga furnizimet ruse të naftës.

Embargoja përfshin naftën ruse të transportuar nga deti, ndërsa përjashton naftën e importuar përmes tubacioneve.

Hungaria, një vend pa dalje në det, që siguron mbi 60 për qind të naftës dhe 85 për qind të gazit të saj natyror nga Rusia, kishte kërcënuar se do të kundërshtonte kufizimet në importet e naftës, një veprim që do të kishte dëmtuar përpjekjet që kërkojnë konsensusin e të gjitha vendeve anëtarëve të BE-së.

Presidenti i Këshillit Europian, Charles Michel, tha se pret që ambasadorët e BE-së të miratojnë zyrtarisht embargon të mërkurën që është pjesë e një pakete më të gjerë sanksionesh.

Udhëheqësit ukrainas kanë kërkuar prej kohësh ndalimin e importeve të naftës ruse për t’i hequr Rusisë të ardhurat me të cilat ajo financon luftën në Ukrainë. Presidenti ukrainas Volodimir Zelenski përsëriti thirrjen e tij të hënën në një fjalim drejtuar Këshillit Europian.

Me zotimet nga vende të tilla si Gjermania për të hequr gradualisht importet e tyre të naftës ruse, presidentja e Komisionit Europian, Ursula von der Leyen, tha se marrëveshja "do të shkurtojë në mënyrë efektive rreth 90 për qind të importeve të naftës nga Rusia në Bashkimin Europian deri në fund të vitit".

Pjesë të paketës së sanksioneve përfshijnë ngrirjen e pasurive dhe ndalimin e udhëtimit për individë, përjashtimin e bankës më të madhe të Rusisë, Sberbank, nga sistemi global i transfereve financiare SWIFT. BE-ja do t’u ndalojë gjithashtu tre transmetuesve shtetërorë rusë shpërndarjen e përmbajtjes së tyre në vendet e BE-së.

Udhëheqësit e BE-së ranë dakord gjithashtu t'i japin Ukrainës 9.7 miliardë dollarë ndihmë për ekonominë e vendit dhe përpjekjet për rindërtim./VOA





Lajmet e fundit nga