Thethi pushton zemrat e vizitorëve nga e gjithë bota

16 Gusht 2025, 16:07, Qyteti im CNA

Në zemër të Alpeve Shqiptare, Thethi nuk është thjesht një destinacion turistik, por një përvojë që mbetet në kujtesë përjetë. Nga Australia në Zelandën e Re, nga Franca në Austri e Gjermani, turistë nga çdo cep i globit e kanë vendosur këtë fshat piktoresk në listën e tyre të vendeve më të dashura dhe arsyet janë të pafundme.

Të apasionuarit pas hiking-ut e gjejnë Thethin si një strehë të përsosur për të eksploruar shtigjet malore. Thethi është një kombinim perfekt i natyrës së paprekur, traditës dhe mikpritjes shqiptare.

“Të zgjohesh në një ditë me diell, me qiell të kaltër, të rrethuar nga malet, në një fshat të bukur si Thethi, si mund të mos jetë një ditë e mirë. Jam nga Australia, e dua Thethin aq shumë sa kam ardhur në Shqipëri 8 javë më parë dhe, në total, kam kaluar gati një muaj këtu në Theth, duke u larguar dhe kthyer përsëri, sepse e dua aq shumë. E rekomandoj shumë Thethin sepse shtëpitë dhe shtëpitë e pritjes këtu janë thjesht të bukura dhe atmosfera, ndjesia këtu është thjesht magjike, është magjike, është mistike, të jep ngrohtësi. Ti vjen në Theth, eksploron ujvarën, del për ecje tek Syri i Kaltër, noton në ujin e ftohtë, shkon në male, ha ushqim të mirë tradicional, pi me miqtë e tu, pi kafe me miqtë e tu, të vendos ty një lloj të vet të magjisë dhe të përfshin brenda saj. Nuk njoh ndonjë që s’do të vijë sërish apo nuk dëshiron të rrijë më gjatë”, tha një pushues australian.

“Vij nga Austria, përshtypja jonë e parë për Thethin ishte e mrekullueshme sepse nuk e prisnim këtë lloj lëndine në mes të maleve. Është më thjeshtë, më relaksuese këtu sesa në Austri”, tha një tjetër pushues.

“Është shumë fantastike këtu, na pëlqeu shumë, është shumë impresionuese me kaq male, thjesht shumë bukur”, u shpreh një tjetër turist.

Paulin Polia, pronar i një prej bujtinave të njohura të zonës, shprehet se është koha për një vizion më të qartë

"Ne po reflektojmë, tashmë po ia dim vlerën turizmit.Duhët një strategji sesi të funksionojmë sepse nuk mund të bëjmë një këmbë ktej një këmbë andej.Pritja është e mirë dhe duhët shfrytëzuar. Duhët serjozitet dhe shërbim", tha Paulin Polia.

Thethi ofron edhe mundësi të reja për aventurierët.

Një zip line spektakolar i jep mundësinë vizitorëve të shohin nga lart panoramën e fshatit dhe të ndiejnë adrenalinën mes maleve, duke e bërë përvojën edhe më të paharrueshme.

"Ziipline është një atraksion që nuk e gjen në të gjitha vendet e Shqipërisë.Një atraksion si Thethi, shtimi i ziipline e bën dhe më të veçantë.Turistë nga e gjithë bota përcec hollandez, gjerman së fundmi edhe Brazilian.Për dikë që nuk e ka provu është pak e sikletshme por pastaj adrenalinë e veçantë", u shpreh një punonjës i Zip Line Theth, Enis Duraj.

Me bukuritë natyrore që mahnisin dhe aventurat që të ngjitin adrenalinën, Thethi vazhdon të fitojë zemrat e turistëve nga e gjithë bota./ CNA