web counter
LEXO PA REKLAMA!

SHKARKO APP

App Store
Google Play

E fundit!

x

Projektligji për gjuetinë/ Shoqata e Gjuetarëve Shkodër: Po lihemi jashtë loje

15 Gusht 2025, 15:05, Qyteti im CNA

Projektligji për gjuetinë/ Shoqata e Gjuetarëve Shkodër: Po

Projektligji i ri i gjuetisë pritet të miratohet në Kuvend në fund të shtatorit, por deri atëherë Federata e Gjuetarëve do të zhvillojë edhe një takim tjetër për disa pika për të cilat nuk janë dakord në këtë projektligj. Zyhdi Mustafa, kryetar i Shoqatës së Gjuetarëve në Shkodër, shprehet se nuk kanë rënë dakord që zonat pyjore të gjuetisë t’i marrin individë apo shoqata të biznesit sepse do të kthehet në tregti, duke nxjerrë gjuetarët jashtë loje.

“Në fund të shtatorit, sapo të mblidhet Parlamenti i ri, pritet që të kalojë ligji i ri për gjuetinë. Data e hapjes së sezonit të gjuetisë pritet që të jetë 1 tetori, edhe pse gjithmonë ka qenë 15 gushti. Gjithsesi, besoj përpara miratimit të ligjit, ne si federatë e gjuetisë do të kemi edhe një mbledhje tjetër me përfaqësues të Parlamentit dhe ministrisë dhe shoqatat mjedisore për të diskutuar disa pika për të cilat ne ende nuk jemi dakord. Në takimet e mëparshme, disa prej pikave tona që kemi kërkuar janë marrë parasyshm ndërsa disa të tjera ende jo. Kemi shpresë se në këtë takim të fundit do t’ia arrijmë që të plotësojmë edhe ato kërkesa që kemi, në mënyrë që të ndryshohen sipas asaj që është më mirë dhe që kërkojnë gjuetarët në të gjithë vendin. Pikat për të cilat nuk jemi dakord janë që zonat e gjuetisë të mos u jepen individëve privatë apo bizneseve sepse më pas gjuetia kthehet në tregti. Gjuetia nuk është tregti, por një pasion dhe një gjë e tillë i nxjerr pastaj gjuetarët jashtë loje dhe ne do të kërkojmë me forcë që kjo të ndryshohet. Nuk jemi dakord që gjuetia të dalë në ankand siç parashikon projektligji i ri dhe besoj se do t’i ndryshojmë edhe këto pika. Në rast se ligji i ri shtyhet dhe nuk miratohet atëherë gjuetia do të hapet më 1 tetor, besojmë siç na është premtuar dhe do të veprojmë me ligjin e vjetër deri në miratimin e ligjit të ri. Moratoriumi 10-vjeçar që ndaloi gjuetinë ka sjellë dëme të mëdha, pavarësisht se institucionet mundohen të thonë të kundërtën”,-tha Mustafa.

Projektligji për gjuetinë/ Shoqata e Gjuetarëve Shkodër: Po

Sekretari i shoqatës, Xhabir Mehmeti, shprehet se vonesat për hapjen e sezonit të gjuetisë këtë vit janë për shkak të neglizhencave të qeverisë, duke e shtyrë më 1 tetor. Mehmeti thotë se aktualisht në Shkodër nga 12 mijë armë gjahu, 5 mijë armë janë pa leje me të cilat mund edhe të abuzohet, ndërsa 5 mijë të tjerave u ka kaluar afati i skandencës.

“Këto vonesa për hapjen e sezonit të gjuetisë dhe ndryshimi i datës herë më 15 gusht, herë 1 shtator dhe tani 1 tetor janë të gjitha për neglizhenca të ministrisë. Sa i përket moratoriumit 10-vjeçar që ndaloi gjuetinë, që më në fund u hoq, dua të them se ka ndikuar negativisht dhe janë krijuar grupe gjuetarësh të paligjshëm që kanë kryer dëme të mëdha. Gjuetia është hapur gjithmonë më 15 gusht, tani e shtynë për 1 tetor. Një përgjegjësi duhet të ketë edhe policia për gjuetarët e paligjshëm. Aktualisht në Shkodër janë 12 mijë armë gjuetie, prej të cilave 5 mijë janë pa leje dhe 5 mijë të tjera u ka mbaruar afati. Këto armë pa leje mund të keqpërdoren dhe në rast se policia të kap, mund të arrestohesh për armëmbajtje pa leje”,-tha Mehmeti.

Disa vitë më parë, në Shoqatën e Gjuetatëvë në Shkodër kanë qenë 900 anëtarë, ndërsa sot kjo shoqatë ka përfunduar me 30 anëtarë, duke i lënë vend gjuetisë së paligjshme. Shoqata dhe federata e gjuetarëve gjatë 10 viteve të moratoriumit që ndaloi gjuetinë në gjithë vendin pretendojnë se gjuetia e paligjshme ka lulëzuar maksimalisht, ndërsa janë në pritje të miratimit të projektligjit të ri në shtator për t’i hapur dritën jeshile gjuetisë së rregullt./CNA





Lajmet e fundit nga