E fundit!

09:08 Aktualitet

Krimi që ka ndodhur me protestën

Qytetarët kanë të drejtë të protestojnë, rinia, familja. K...

Urimi për Vitin e Ri/ Berisha: 2026 duhet t’i japë fund narkoshtetit dhe të rikthejë demokracinë

31 Dhjetor 2025, 16:32, Politikë CNA

Urimi për Vitin e Ri/ Berisha: 2026 duhet t’i japë fund

Kryetari i Partisë Demokratike, Sali Berisha, ka përcjellë një urim për Vitin e Ri 2026, të shoqëruar me akuza ndaj qeverisë dhe kryeministrit Edi Rama, duke e cilësuar vitin 2025 si një nga më të errëtit për demokracinë shqiptare.

Në mesazhin e tij drejtuar qytetarëve, Berisha uroi fillimisht Vitin e Ri, duke theksuar se viti 2026 duhet të jetë një vit shprese dhe bashkimi për shqiptarët. Më pas, ai ndaloi në një bilanc të vitit që lamë pas.

Sipas Berishës, viti 2025 i gjeti shqiptarët më të varfër, me paga dhe pensione më të ulëta në Europë, ndërsa, nga ana tjetër, drejtuesit e qeverisë dhe zyrtarë të lartë u pasuruan në mënyrë marramendëse.

Berisha shtoi se zgjedhjet e vitit 2025 u kthyen në farsë elektorale për shkak të ndërhyrjes së krimit të organizuar dhe përdorimit të shtetit në funksion të pushtetit.

Berisha theksoi se opozita ka arritur të denoncojë situatën në arenën ndërkombëtare, duke kujtuar rezolutat dhe raportet e OSBE/ODIHR-it që, sipas tij, evidentojnë shtypjen e pluralizmit dhe degradimin e procesit zgjedhor në Shqipëri.

Në përfundim të mesazhit të tij, Berisha u shpreh se viti 2026 duhet të jetë viti i rikthimit të demokracisë shqiptare, i bashkimit të qytetarëve dhe i përpjekjes për të rrëzuar atë që ai e quajti regjimin e narkoshtetit.

Deklarata e Berishës

Të dashur qytetarë dhe qytetare shqiptarë!
Sonte ne presim vitin e ri 2026!
Ndaj dhe unë nga zemra ju uroj, kudo që ndodheni, në votrat familjare, në lokale, në udhëtime, në Shqipëri, në botë, në institucionet e vuajtjes së dënimit, në spitale,
Gëzuar vitin e ri 2026.
Viti i ri për të gjithë shqiptarët, për të gjithë njerëzit, është vit shprese.
Por, siç është tradita, nuk mund të ndahemi nga ky vit pa hedhur një vështrim drejt tij.
Viti 2025 ishte një vit që shqiptarët kurrë nuk e meritonin.
Ky vit i gjen ata qytetarët më të keqpaguar në Europë.
Qytetarët me tavolinat më të pakta, sepse blejnë me çmimet më të shtrenjta, me rroga më të ulëta, me pensionet më të ulëta.
Por ky vit i gjen ata gjithashtu me drejtorët, ministrat, qeveritarët më të pasur në Europë.
Pasuritë e tyre marramendëse arrijnë pasuritë e regjimeve diktatoriale të dikurshme të Afrikës së 30 viteve më parë.
Viti që lamë pas ishte një vit në të cilin kombi u pakësua dhe më shumë.
Mijëra shqiptarë u ndanë nga jeta më shumë sesa erdhën në këtë jetë.
Viti 2025 ishte viti i agonisë së plotë të demokracisë shqiptare.
Narkodiktatori, duke përdorur të gjitha mjetet dhe potencialet e një shteti, rrëmbeu votën e shqiptarëve dhe ndërtoi mazhorancën e krimit.
Viti që lamë pas ishte viti i zjarreve, përmbytjeve më të mëdha, të cilat nuk ndodhën vetëm në Shqipëri, por ato për ne shqiptarët erdhën si në një vend pa shtet.
Në fakt, viti 2025 do të mbahet mend edhe si viti i zbulimit të vjedhjeve më të mëdha në historinë kombëtare të shqiptarëve nga Edi Rama, Lubi Balluku, familja Rama, Erjon Veliaj, drejtorët e tij në ministri, në bashki, zyrtarë në tërësi.
Ky ishte viti në të cilin u burgos pas 46 protestave, kryetari i Bashkisë Tiranës.
Viti në të cilin në regjistrat e prokurorisë, dolën emrat dhe vjedhjet e paimagjinueshme të Lubi Ballukut me 300 apartamente, dy jahte, 15 supermarkete.
Emri i Edi Ramës në të gjitha mesazhet si përcaktues i tenderave dhe vetëm në tunelin e Llogarasë u zhdukën të paktën 50 milionë euro.
AKSHI, përbën skandalin më të madh korruptiv jo të Shqipërisë, po të Europës.
AKSHI, kopshti privat i Edi Ramës, ishte epiqendra e krimit shtetëror, të padëgjuar më parë.
Kopshti privat që varej direkt nga Edi Rama, ishte epiqendër e rrëmbimeve, pengmarrjeve për vjedhjen e qindra milionë eurove, në epiqendër të të cilës është Edi Rama me Lindat e tij, Lindën e AKSHI-t, por dhe Lindën e Surrelit për shkak të kunatit.
AKSHI është super skandali në të cilin të gjitha të dhënat personale, sekrete të çdo qytetari shqiptar, kaluan në duart e bandave.
Kaloi kadastra e shtetit.
Kaloi çdo e dhënë.
Dhe akoma më keq, të gjitha sekretet që NATO i ka besuar Shqipërisë, u eksportuan në kartel e drogës dhe tek armiqtë e saj, armiqtë e NATO-s.
Viti 2025 ishte viti në të cilin kartelet e drogës të lidhura direkt me qeverinë shqiptare dhe me Edi Ramën, morën në dorë dhe u bënë zotër të tregut të kokainës në Europë.
Pra u bënë kartelet më të fuqishme.
Ato me ndërhyrjet e tyre aktive në zgjedhjet e 11 majit, apo për ndërhyrjet e tyre, u shpërblyen me leje për ndërtimin e 450 kullave, resorteve turistike, pallateve dhe vilave në mbarë territorin.
Pra, viti ishte të themi, viti në të cilin narkoshteti u konsolidua me shpejtësinë më të madhe.
Por ishte dhe viti në të cilin opozita shqiptare ja doli të gozhdojë para komunitetit ndërkombëtar Edi Ramën si armik i egër i pluralizmit.
Në 7 rezoluta denoncohet shtypja e pluralizmit nga institucionet e narkoshtetit.
Denoncohet narkoshteti, denoncohen vjedhjet e shqiptarëve dhe shndërrimi i procesit zgjedhor në farsë elektorale.
Kontrolli total mbi mediat dhe mashtrimi i tmerrshëm që ato ju bëjnë qytetarëve, për shkak të kontrollit mafioz.
Të gjitha këto janë sanksionuar edhe në dokumentin themelor të OSBE-ODIHR-it për zgjedhjet në Shqipëri.
Pra miq, të gjitha këto përbëjnë një bazë të fuqishme për çdo qytetar shqiptar për veprim, ndaj dhe me besim të plotë mund të themi se viti 2026 është viti i shpresës së madhe, për Shqipërinë dhe shqiptarët.
Është viti në të cilin ata do bashkohen si kurrë më parë për t'i bërë funeralin organizatës kriminale që quhet Rilindja dhe kryesohet nga Edi Rama.
Do bashkohen si kurrë më parë për të shpëtuar demokracinë shqiptare, rikthimin e votës së lirë.
Për të shpëtuar familjen shqiptare nga një ligj shkatërrimtar për gjininë dhe familjen.
Për të shpëtuar Shqipërinë nga rrokullisja e saj e madhe.
Pra, këtë vit çdo shqiptar që e do këtë vend, e fillon si misionar, e fillon në lartësinë e një misioni të madh shpëtimtar.
Ndaj dhe unë dua sonte t'ju uroj ju, gëzuar kudo që ndodheni.
Një vit të mbarë në lartësinë e shpresave dhe pritshmërive tuaja.
Gëzuar!