“2025, vit historik për ushtrinë”/ Rama: Jemi një nga vendet me kapacitetin më të lartë të mbrojtjes kibernetike

30 Dhjetor 2025, 11:44, Politikë CNA

“2025, vit historik për ushtrinë”/ Rama: Jemi një nga

Kryeministri Edi Rama ka folur edhe për sektorin e Mbrojtjes, ku u shpreh se Shqipëria ka aktualisht ushtrinë më të mirëpaguar në rajon, duke lënë pas edhe Serbinë.

Rama u shpreh se do të vijohet me rritjen e pagave për ushtrinë, me synimin për të arritur mesataren e vendeve të NATO-s. Ai e cilësoi këtë vit si historik për ushtrinë e vendit sepse sipas tij janë hedhur themelet e industrisë së mbrojtjes “Made in Albania”.

“Janë 721 rekrutë të rinj që u janë bashkuar Forcave të Armatosura këtë vit. Kemi ushtrinë më të mirëpaguar në rajon, përfshirë dhe Serbinë. Do të vazhdojmë me rritjen e pagave të ushtrisë. Synimi, të arrijmë mesataren e ushtrive të NATO-s. Ky vit që hyn na gjen me një sistem raketor që e kemi në Shqipëri, na gjen me 3 anije patrulluese nga Italia, me radarë të vëzhgimit ajror.

Shqipëria është një vend prodhues i kapaciteteve ushtarake jo vetëm për nevojat e veta, por edhe t'i eksportojë. Ky vit është historik për ushtrinë tonë sepse janë hedhur themelet e industrisë së mbrojtjes 'Made in Albania'. Më në fund do të prodhojmë uniforma dhe do ta bëjmë pikë referimi edhe për vendet e tjera. Do të prodhojmë mjete të blinduara dhe mjete të emergjencës civile. Po prodhohen një sërë mjetesh, si ambulanca, mjete patrullimi policor. Do të prodhojmë dronët ushtarakë dhe sistemet antidronë. Në 2026 do të shihni edhe produktet e para. Rritja e buxhetit të mbrojtjes është historike dhe kjo dihet sepse jemi pjesë e NATO-s.

Kemi vazhduar të vëmë rregull në pronat shtetërore. Na akuzojnë për një kompani shtetërore që kemi ngritur për shtetin. E kemi ngritur për shtetin që në çdo lloj qasjeje nga të huajt në Shqipëri, shteti të marrë pjesën e vet. Kemi një sërë investimesh në mbarë vendin. Vitin e ardhshëm do të përqendrohemi në ngritjen e shkollës së aviacionit në Vlorë dhe kampusin e Forcave të Armatosura. Po punojmë për rritjen e kapaciteteve të Mbrojtjes Civile në të gjitha drejtimet. Kemi vendosur dhe fondin për të blerë dy avionët e parë zjarrfikës”, tha Rama.

Më tej Rama foli edhe për sulmet kibernetike, ku tha se Shqipëria është një nga vendet me kapacitetin më të lartë të mbrojtjes kibernetike.

“Jemi një nga vendet me kapacitetin më të lartë të mbrojtjes kibernetike. E thonë të gjitha institucionet në Europë. Kemi marrë vlerësime për këtë. Shqipëria si çdo vend sulmohet, por asnjë sulm nuk ka arritur të penetrojë në murin e strukturës sonë kibernetike digjitale”, tha Rama. /CNA