Spiunë dhe “non grata”, në politikë?/ Kandidati për kreun e FRPD-së: Shqipërisë i duhet drejtësi pa kushte

31 Gusht 2022, 20:06, Politikë CNA

Spiunë dhe “non grata”, në politikë?/ Kandidati

Arnold Kariqi

Arnold Kariqi, njëri nga 6 kandidatët për lidershipin e ri të Forumit Rinor të Partisë Demokratike, në një intervistë për CNA.al, është ndalur të komentojë dhe çështjet e fundit politike në vendin tonë.

I pyetur nëse i duhen politikës "non grata" dhe ish-spiunët, ai tha se sot kemi më shumë nevojë për drejtësi, vlera dhe për të rikthyer ndjenjën e kombit dhe shqiptarizmit.

“Shqipërisë në fakt i duhen vlera për të rikthyer ndjenjën e kombit dhe shqiptarizmit, pra për t'u dhënë të gjithëve mundësinë për të qëndruar e zhvilluar në Shqipëri. Sigurisht për t'u krijuar mundësinë të gjithëve të angazhohen kudo në botë jemi në një epokë të lëvizjes së shpejtë, por shprehja guri i rëndë në vendin e vet ka kuptimin e saj!

Së dyti shqipëria ka nevojë për drejtësi dhe jo thjesht një term 'non grata'. Pra, çfarë kuptimi ka pyetja a i duhen politikës, kur të shpallurit 'non grata' prej vitesh nën pushtetin e partisë socialiste vazhdojnë blejnë vota si në Durrës apo në Shkodër, vazhdojnë marrin tendera e vendosin për punësime. Pra, vërtet nuk janë në një politikë aktive, por përmes pushtetit që kanë mbledhur vazhdojnë të kenë ndikim të fortë në vendimmarrjen e vendit apo të pushtetit vendor. Pra, në këtë kuptim do të duhet të flitet me prova dhe ku drejtësia të veprojë për të dënuar këdo që ka abuzuar, përndryshe kjo nuk do të jetë zgjidhje, por votat do të vazhdojnë të blihen duke e shtyrë vendin gjithnjë e më shumë në krizë dhe duke deformuar demokracinë tonë që tashmë është e brishtë.

Dhe më tej a i duhen vendit ata që firmosin kontrata korruptive miliona euro dhe politikanë që u kanë dalë letrat hapur dhe vazhdojnë të qetë. Ndaj theksoj dhe njëherë, Shqipërisë i duhet drejtësi pa kushte."

Sa u përket bashkëpunëtorëve të sigurimit të shtetit, ai tha se është një debat që duhej të ishte zgjidhur 30 vite më parë në Shqipëri, dhe se sot rikthehet me prapavijë politike.

Sa u përket bashkëpunëtorëve të sigurimit të shtetit, është një debat që duhej të ishte zgjidhur 30 vite më parë në Shqipëri. Së pari dhe së paku pasi përmes dosjeve të pahapura mund të jenë peng në vendimmarrje të ndryshme. Së dyti për t'u dhënë qetësi palëve të dëmtuara në 45 vite diktaturë. Tashmë 30 vite pas, ky debat rikthehet për mendim tim me prapavijë politike. Por kam një tjetër pyetje, a do të duhet që të zgjerohet edhe me tej problemi. Pra ish-udhëheqësit e periudhës së diktaturës a duhen dënuar për veprimet e tyre, dhe a duhet të preken nga pasoja pasardhësit e tyre që u arsimuan dhe u ngritën politikisht falë abuzimeve të prindërve të tyre?

Është një pikë që pakkush e prek, por nëse shikojmë konfigurimin e elitës së sotme politike duket qartë që kemi ndryshim emrash, por jo familjeve që drejtuan vendin në 45 vite!”/CNA.al