Rama nuk ndal akuzat për Bullgarinë/ Meta “i hedh në sulm” Agim Neshon

31 Gusht 2022, 18:25, Politikë CNA

Rama nuk ndal akuzat për Bullgarinë/ Meta “i hedh në

Zëvendëskryetari i Partisë së Lirisë, Agim Nesho

Zëvendëskryetari i Partisë së Lirisë, Agim Nesho, ka sulmuar kryeministrin Edi Rama, pas deklaratës që ky i fundit bëri në forumin e Bled, ku ngriti akuzat se Bullgaria ka penguar për tetë vite integrimin e Shqipërisë në BE.

Në një deklaratë për mediat, Nesho tha se retorika e Ramës me ministrinë e jashtme bullgare është sinjali i pasojave që do të kemi në të ardhmen europiane.

Ai u shpreh se kreu i qeverisë po përpiqet të imponojë një axhendë joeuropiane për Shqipërinë, duke kritikuar, provokuar vendet europiane dhe vetë Bashkimin Europian.

Sipas tij, sjelljet e kryeministrit kanë si qëllim bllokimin e procesit të përbashkët konsensual të integrimit të vendit tonë në BE.

“Në përgjigje të retorikës boshe por të qëllimshme të Kryeministrit Rama në forumin e Bled, se ‘Bullgaria per tetë vite ka penguar integrimin e Shqipërisë në BE’, Ministria e Punëve të Jashtme të Bullgarisë ka deklaruar se këtë deklaratë anti-Bullgare dhe anti-europiane do ta ndjekë sipas të drejtës ndërkombëtare dhe europiane.

Akuzat për shpifje ndaj kryeministrit Rama, të bëra nga një vend anëtar i Bashkimit Europian dhe anëtar i NATO-s, një vend historikisht mik i Shqipërisë, ngre alarmin për diskursin antieuropian në të gjitha planet: ndaj politikave të BE-së, ndaj vendeve të vecanta si dhe dështimin në plotësimin e kërkesave themelore të Parlamenit Europian, Bundestagut Gjerman, për forcimin e shtetit ligjor dhe demokracisë në Shqipëri.

Duket se zoti Rama, autokrati i ri i Shqipërisë, po përpiqet të imponojë një axhendë jo europiane për Shqipërinë, duke kritikuar, provokuar vendet europiane dhe vetë Bashkimin Europian për të bllokuar procesin e përbashkët konsensual të integrimit të vendit tonë në BE.

Partia e Lirisë, e shikon këtë politikë të personalizuar të zotit Rama si shumë të rrezikshme dhe me pasoja për Shqipërinë dhe të ardhmen e saj europiane.

Qeveria Shqiptare e zotit Rama duhet të kuptojë, që shtetet europiane si Franca, Hollanda, Bulgaria ishin preteksti.

Por fakti real, ishte në mungesën e vullnetit politik të kësaj qeverie për të luftuar korrupsionin, krimin e organizuar, kapjen e shtetit, etj.

Siç është edhe sot, vullneti i kryeministrit dhe shumicës së tij parlamentare, për të miratuar ligje anti-europiane, si “Pashaportat e Arta”, Amnistia Fiskale Kriminale, Projektet Strategjike pa transparencë dhe duke përjashtuar investitorët Europianë.

Pasioni, për t’ju përkushtuar Ballkanit të Hapur nga qeveria Rama si dhe zbatimi i axhendave rajonale të miqve të rinj ballkanik, sjellin si pasojë qëndrimet provokative ndaj Bullgarisë dhe mospëlqimi dhe kritikat ndaj BE-së.

Partia e Lirisë shpreh keqardhjen për këto raporte të panevojshme dhe të dëmshme ndaj një vendi mik si Bullgaria, dhe do të qëndrojë e angazhuar për bashkëpunim të sinqertë, me gjithë vendet e rajonit dhe Bashkimit Europian”, theksoi Nesho./ B.A. – CNA.al