Zgjedhjet në FRPD/ Arnold Kariqi, spikeri ambicioz sfidon veten përballë 5 rivalëve

31 Gusht 2022, 19:51, Politikë CNA

Arnold Kariqi

Forumi Rinor i Partisë Demokratike ka hapur garën për zgjedhjen e kreut të ri që prej 1 gushtit.

Në fushatën, e cila pritet të zgjasë deri më 30 shtator, janë përfshirë 6 kandidatë.

Një prej emrave potencialë për lidershipin e FRPD-së, është edhe Arnold Kariqi, i cili vec angazhimit në politikë, është një figurë jo pak e njohur dhe në fushën e medias.

Në një intervistë për CNA.al, ai ka treguar arsyet që e shtynë të garonte në këto zgjedhje.

Duke e konsideruar si një sfidë me veten, Kariqi thekson se përtej një vendimi, është edhe angazhimi i tij ndër vite në mes të rinjve të FRPD-së, që e ka frymëzuar që të shkojë një hap më tej, duke sfiduar të drejtojë Forumin Rinor.

“Në fakt nuk bëhet fjalë për një vendim, por një rezultat të angazhimit tim ndër vite mes të rinjve të partisë demokratike dhe në aktivitetet e kësaj force politike. Pra, vetiu vetë pjekuria e krijuar në këtë angazhim, më ka frymëzuar që të shkoj në një tjetër hap duke sfiduar të drejtoj Forumin Rinor, që për mendimin tim duhet të jetë një organizëm i gjallë dhe gjithnjë aktiv!”

Por në një garë me 6 kandidatë, duket se Arnoldi është modest, duke i vlerësuar të 5 rivalët si të denjë, megjithëse me bindjen për ta fituar garën.

“Në fakt i vlerësoj të pestë kandidatët si rivalë të denjë, për të cilët do të kërkoja që në këtë fushatë të paraqiteshin me ide të qarta për të sjellë një ndryshim të fortë të frymës së sjelljes së FRPD. Duhen vlerësuar të gjithë individët që morën iniciativën për të qenë pjesë e garës duke treguar që të rinjtë e PD janë këtu dhe gjithnjë do të sjellin figura të reja për të çuar më përpara vlerat e vendit tonë.

Së dyti duhen vlerësuar për guximin e tyre pasi është e vështirë që në këto ditë kur Partia Socialiste ka një mandat të tretë të sfidosh për të drejtuar një forum opozitar.

Por, sigurisht mendoj që eksperienca që unë kam në Partinë Demokratike dhe me ide të qarta për të vënë në lëvizje të fortë motorët e FRPD në të gjitha rrethet, më bën të ndihem më i sigurt për të fituar këtë garë. Por ajo çfarë do të shtoja është që të gjithë kandidatët do të kenë mundësinë që të ofrojnë idetë dhe propozimet e tyre kurdo dhe kudo nëse unë do të fitoj”.

I pyetur për sekretin e fushatës së tij, Kariqi deklaroi se janë emocionet dhe energjitë që i japin takimet me të rinjtë dhe të rejat demokrate.

“Nëse i përgjigjem kësaj pyetjeje i bie të mos jetë më sekret. Në fakt nuk kam të tillë përveç dashurisë për Partinë Demokratike, vlerat e saj, emocionet dhe energjitë që më japin takimet me të rinjtë dhe të rejat demokrate si dhe me ata që janë angazhuar prej vitesh në këtë parti.”/CNA.al