E fundit!

20:27 Politikë

“Ligji për investimet strategjike do të shfuqizohet”/ Rama tregon çfarë do të ndodhë me ligjin për zonat e mbrojtura

Kryeministri Edi Rama është shprehur në konferencën ndërqe...

Socialistët, “në rrjetën” e SPAK-ut

4 Korrik 2024, 21:15, Politikë CNA

Edi Rama para selisë rozë

Qeveria e kryeministrit Edi Rama, që prej vitit 2013 drejton vendin, ndërsa rendit një sërë arritjesh përgjatë vitesh. Nga ana tjetër, një pjesë e mirë e “ushtarëve” të Ramës kanë rënë në “fushëbetejë” duke u kapur në vjedhje e abuzime fondesh, shpërdorim detyre dhe një sërë akuzash të tjera, të bëra në kurriz të shqiptarëve dhe parave të tyre.

SPAK ka marrë nën hetim, si dhe ka vendosur pas hekurave ministra, deputetë, zyrtarë të rëndësishëm, përfshirë këtu dhjetëra kryebashkiakë socialistë. SPAK ka lëshuar masë arresti edhe për ish-zëvendëskryeministrin Arben Ahmetaj, i cili është larguar nga vendi, ndërsa ish-ministri i Mjedisit Lefter Koka është arrestuar. Të dy zyrtarët janë akuzuar për aferën e inceneratorëve. Në pranga, po ashtu për të njëjtën çështje, është vënë edhe ish-deputeti Alqi Bllako.

Fotomontazh - Alqi Bllako dhe Lefter Koka

Më herët pas hekurave ka qenë edhe ish-ministri Saimir Tahiri, i cili së fundi është thirrur sërish nga SPAK, për hetim pasuror. Këtë të enjte po ashtu në pranga ka rënë ish-ministri i Shëndetësisë, Ilir Beqaj, pasi akuzohet se abuzoi me fondet e Agjencisë Shtetërore të Programimit Strategjik dhe Koordinimit të Ndihmës (SASPAC) kur ishte në krye të këtij institucioni përgjatë vitit të fundit.

SPAK-u arreston Ilir Beqajn dhe dy persona të tjerë
4 Korrik, 09:11

Janë edhe kryebashkiakë apo ish-kryebashkiakë, në grupin e socialistëve të cilët e kanë “mbi supe” të paktën një akuzë nga SPAK-u. Përmendim këtu ish-kryetarin e bashkisë së Lushnjës, Fatos Tushe, ish-kryebashkiaku i Bulqizës, Lefter Alla, ish-kryebashkiaku i Durrësit, Vangjush Dako, ish-kryebashkiaku i Kukësit, Safet Gjici, kryebashkiaku i Rrogozhinës, Edison Memolla, kryebashkiaku i Kamzës, Rakip Suli, Qerim Ismailaj i Bashkisë Mallakastër, etj.

Selia e PS-së

Lista e gjatë vijon me zyrtarë të ministrive të cilët kanë abuzuar në forma të ndryshme.

“Armata” e Ramës e kapur “në rrjetën” e SPAK është e gjatë, por kryeministri për të gjithë ka të njëjtën përgjigje: Ata kanë ngrënë “dardha pas shpine” dhe përgjegjësia është tërësisht personale.

SPAK ditë pas dite zgjeron listën e socialistëve që kanë shpërdoruar detyrën, ndërsa Rama vijon linjën e tij të mos mbajturit përgjegjësi, pasi këto të fundit janë “mëkate” tërësisht personale të cilido prej socialistëve, por kurrsesi të kryesocialistit./ CNA