E fundit!

19:11 Aktualitet

Sot protesta e 47-të kundër qeverisë/ Qytetarët mblidhen në sheshin “Skënderbej”

Këtë të enjte po mbahet në Tiranë protesta qytetare e 47-t...

“Ripërtëritja e PD nënkupton vizion"/ Berisha: Beteja dhe programi jonë është për lirinë e shqiptarëve

30 Maj 2026, 13:51, Politikë CNA

“Ripërtëritja e PD nënkupton vizion"/ Berisha: Beteja

Kryetari i PD-së, Sali Berisha gjatë fjalimit të tij në Kuvendin Kombëtar, u shpreh se kjo forcë politike nuk ndodhet më në një fazë mbrojtjeje politike, por në atë që ai e ka cilësuar si “kilometri i fundit” drejt fitores.

Në fjalën e tij para delegatëve, kryedemokrati theksoi se detyra kryesore e PD-së është ripërtëritja e parties, ndërsa akuzoi kryeministrin Edi Rama për keqqeverisje.

Berisha u shpreh se beteja e demokratëve është një betejë për dinjitetin kombëtar dhe liritë demokratike të qytetarëve. Ai u ndal edhe te programi politik i Partisë Demokratike, duke kundërshtuar pretendimet se opozita nuk ka një platformë qeverisëse.

“Sot nuk jemi më forca politike që lufton në mbrojtje. Jo, sot jemi forca politike në kilometrin e fundit, në kilometrin që ecim drejt fitores. Në këtë kilometër të fundit të kësaj maratone, ne kemi detyra shumë të rëndësishme, detyra dhe detyrime kapitale. Detyra jonë numër një që ua kemi borxh demokratëve dhe shqiptarëve është ripërtëritja. I kapërcyem të gjitha barrikadat që na vunë përpara. E futëm në rrethin e kuq narkodiktatorin. Diku e thërrasin Ramaduro, të tjerë e thërrasin Edi Balluku.

Kurse ne do e largojmë atë me çdo çmim nga pushteti. Demokrate e demokratë, ja ku jemi këtu, t’u themi shqiptarëve se për ne, njerëzit që adhurojnë kombin dhe flamurin e tij, për ne, flamuri kombëtar do mbetet në gjysmështizë gjersa flamuri i votës së lirë të shqiptarëve të valëvitet krah tij. Beteja jonë është betejë për flamur, është betejë për dinjitet kombëtar, është betejë për lirinë e shqiptarëve. Ndaj dhe ripërtëritja e partisë është dhe duhet të jetë vepra jonë madhështore.

Duhet të jetë vepra jonë për të ripërtërirë nesër Shqipërinë. Duhet të jetë vepra jonë për t’u rikthyer shqiptarëve votën e lirë. Ripërtëritja e PD parakupton para së gjithash vizion. Por ka program më madhështor se programi ynë? U garantoj se nuk ka program më madhështor. Por ky program bombardohet çdo minutë, çdo orë nga mediat e qeverisë, të cilat përsërisin në sintoni se PD nuk ka program. Kush nuk ka program? Si nuk ka program partia e ëndrrave të shqiptarëve? Pa kthehemi pak mbrapsht, a nuk ishte ëndërr anëtarësimi i Shqipërisë në Këshillin e Evropës? Kush e bëri realitet?

A nuk ishte ëndërr Rruga e Kombit? Kush e bëri realitet? A nuk ishte ëndërr heqja e vizave, arritja e jetës e shqiptarëve? Kush e bëri realitet? A nuk ishte ëndërr anëtarësimi i Shqipërisë në NATO? Kush e bëri realitet? Kush e thotë se demokratët nuk kanë program, e thonë ata të cilët nga mëngjesi gjer në darkë mbajnë ison që u rrëmbeu ëndrrat shqiptarëve, e partisë që u shkelmon ëndrrat shqiptarëve, e partisë që e la Shqipërinë pa ëndërr, partisë së krimit. Ne jo, ne me vizionin tonë do bëjmë që veprat që përmendem më parë të duken të mesme në krahasim me ato të tjerat”, tha Berisha. /CNA