E fundit!

10:12 Politikë

Vrasja e efektivit në Maliq/ Lamallari: Dënoj aktin e rëndë, Shqipëria humbi një shërbëtor të ligjit

Ministri i Brendshëm, Besfort Lamallari, shprehu humbjen e...

“Rama 4”/ Profil-Kush janë ministrat e rinj të kabinetit?

11 Shtator 2025, 19:35, Politikë CNA

Këtë të enjte, gjatë fjalës së tij në Asamblenë e Partisë Socialiste, kryeministri Edi Rama shpalli kabinetin e ri qeverisës.

Por, kush janë ministrat e qeverisë “Rama 4”?

Belinda Balluku - Zv/Kryeministre dhe ministre e Energjisë e Infrastrukturës (Rikonfirmohet në detyrë)

Balluku është ministër i Infrastrukturës dhe Energjisë që prej janarit të vitit 2019, si dhe Zv. Kryeministre që prej gushtit të vitit 2022. Balluku është diplomuar në Programin Ekzekutiv “Zhvillim Ekonomik” nga Harvard Kennedy School, si dhe me titull nderi nga IATA (International Air Transport Association) për menaxhimin e shërbimeve të lundrimit ajror (Air Navigation Services Management).

Albana Koçiu – Ministria e Punëve të Brendshme (Ishte në krye të Ministrisë së Shëndetësisë, zëvendëson Ervin Hoxhën)

Koçiu ka mbajtur postin e Ministres së Shëndetësisë dhe Mbrojtjes Sociale të Shqipërisë. Përpara kësaj detyre, Koçiu ka mbajtur pozicionin e Drejtorit të Departamentit të Administratës Publike, që prej vitit 2013. Koçiu ka përfunduar studimet në Fakultetin e Shkencave Sociale, në Universitetin e Tiranës, duke u specializuar me një Master Shkencor mbi monitorimin e sistemit të shërbimeve sociale në Shqipëri.

Elisa Spiropali -Ministria për Evropën dhe Punët e Jashtme (Ikën nga drejtimi i Kuvendit dhe zëvendëson Igli Hasanin)

Elisa Spiropali mbajti detyrën si Kryetarja e Kuvendit të Republikës së Shqipërisë, prej 30 korrikut 2024. Spiropali është diplomur në vitin 2005 në dy degë, Politikë dhe Ekonomi në Kolegjin Mount Holyoke në Massachusetts, Shtetet e Bashkuara.

Petrit Malaj - Ministria e Financave (Rikonfirmohet në detyrë)

Prej muajit korrik 2024, Malaj ka mbajtur detyrën e Ministrit të Financave. Përpara kësaj detyre, nga muaji janar 2024, Petrit Malaj shërbeu si Drejtor Ekzekutiv i Agjencisë Kombëtare të Burimeve Natyrore.

Blendi Gonxhja - Ministria e Kulturës, Turizmit dhe Sportit (Vjen nga MEKI dhe pason Mirela Kumbaron që drejtonte Turizmin)

Prej muajit janar 2024, ai ka mbajtur postin e Ministrit të Ekonomisë, Kulturës dhe Inovacionit. Përpara kësaj detyre, nga nëntori 2018, Blendi Gonxhja ka drejtuar Drejtorinë e Përgjithshme të Shërbimeve të Transportit Rrugor.

Sofjan Jaupaj - Ministria e Mjedisit (Mbante detyrën e zv/ministrit të Mjedisit)

Jaupaj u diplomua për Drejtësi në vitin 2013 në Fakultetin e Drejtësisë të Universitetit të Tiranës.

Në 10 vitet e fundit ai ka mbajtur pozicione të ndryshme në sektorin publik në Shqipëri si Drejtor i Kabinetit i Kryenegociatorit për Integrimin në BE të Shqipërisë, Drejtor i Integrimit dhe Koordinator i Lartë për normat ligjore prioritare të BE-së pranë Kryeministrisë dhe Ministrisë së Kulturës dhe aktualisht në 3 vitet e fundit ka qenë i emëruar Drejtor i Përgjithshëm në Ministrinë e Turizmit dhe Mjedisit.

Mirela Kumbaro - Ministria e Arsimit (Vjen nga drejtimi i Ministrisë së Turizmit)

Kumbaro mban titullin Profesore e Asociuar, të fituar në vitin 2012 në Universitetin e Tiranës, në fushën e gjuhësisë. Në vitin 2013, u emëroua Ministre e Kulturës, post që e mbajti për më shumë se 5 vjet, duke u emëruar sërish ministre e Kulturës në vitin 2017 në mandatin e dytë të qeverisë Rama dhe duke u bërë kështu ministrja më jetëgjatë e Ramës.

Evis Sala - Ministria e Shëndetësisë dhe Mirëqenies Sociale (Vjen nga Italia)

Sala drejton Qendrën për Imazheri Diagnostike dhe Radioterapi Onkologjike në Poliklinikën “Gemelli” . Ajo është pedagoge në institucionet e arsimit të lartë, ku kontribuon me përvojën e saj akademike dhe kërkimore për brezin e ri të profesionistëve të shëndetit.

Delina Ibrahimaj - Ministria e Ekonomisë dhe Inovacionit (Vjen nga Ministria e Shtetit për Sipërmarrjen dhe Klimën e Biznesit)

Ka studiuar në Itali në Universitetin e Romës Tor Vergata dhe Universitetin Luigi Bocconi për Financë dhe Menaxhim Ekonomik. Që prej muajit shtator 2023, ka mbajtur postin e Ministres së Shtetit për Sipërmarrjen dhe Klimën e Biznesit. Përpara kësaj detyre, Ibrahimaj ka shërbyer si Ministre e Financave dhe Ekonomisë.

Besfort Lamallari - Ministria e Drejtësisë (Pason Ulsi Manjën. Ky i fundit do të drejtojë komisionin parlamentar të Ligjeve)

Mban detyrën si Zëvendësministër i Brendshëm që nga 9 Tetori 2017. Ka përfunduar studimet universitare për Drejtësi në Universitetin e Tiranës, në vitin 2009.

Ai ka përfaqësuar Kabinetin e Ministrit të Brendshëm në takimet dhe komunikimet me UNODC, Europol, Qendrën Europiane për Monitorimin e Drogave dhe Narkomanisë (EMCDDA), FRONTEX dhe Kolegjin e Policisë Europiane (CEPOL).

Pirro Vengu - Ministria e Mbrojtjes (Rikonfirmohet në detyrë)

Prej korrikut 2024, mban funksionin e ministrit të Mbrojtjes së Republikës së

Përpara se të merrte këtë detyrë, Vengu ka mbajtur postin e drejtorit të Përgjithshëm Ekzekutiv të Autoritetit Portual Durrës, duke nisur nga 2019.

Në periudhën 2017 deri në 2019 ai ka ushtruar funksionin e drejtorit të Antikorrupsionit, në Kryeministri. Ndërsa nga 2013 deri në 2017, Vengu ka qenë shef në Kabinetin e Ministrit të Jashtëm.

Andis Salla – Ministria e Bujqësisë dhe Zhvillimit Rural (Kryebashkiaku aktual i Cërrikut)

Ka kryer studimet e larta për drejtësi në Fakultetin e Drejtësisë në Universitetin e Tiranës.

Është kualifikuar në vitin 2014 si avokat pranë Dhomës Kombëtare të Avokatisë dhe ka një sërë eksperiencash pune si jurist dhe me vonë si Drejtor i IEVP në Elbasan.

Ervin Demo – Ministri i Shtetit për Pushtetin Vendor (Pason Arbjan Maznikun)

Ka kryer studimet e larta për Administrim Biznesi në Universitetin e “Ëestminster” në Londër. Deputet i zgjedhur në qarkun e Beratit në zgjedhjet parlamentare të 2025. Ai ka qene më parë dhe kryetar i Bashkisë Berat për dy mandate radhazi.

Majlinda Dhuka – Ministre e Shtetit dhe Kryenegociatorja e Shqipërisë (Rikonfirmohet në detyrë)

Dhuka është diplomuar në Fakultetin e Drejtësisë të Universitetit të Tiranës, ku ka përfituar edhe titullin "Master" në Studime Evropiane. Ka mbajtur detyrën si Ministre e Shtetit dhe Kryenegociatore e Shqipërisë në procesin e integrimit në Bashkimin Evropian. Ajo u emërua në këtë detyrë më 25 korrik 2022.

Adea Pirdeni - Ministre e Shtetit për antikorrupsionin (Rikonfirmohet në detyrë)

Prej janarit 2024 mban detyrën e Ministrit të Shtetit për Administratën Publike dhe Antikorrupsionin.

Para kësaj, nga shtatori 2020, ajo ka mbajtur postin e Zëvëndësministes së Drejtësisë, dhe Negociatore për Kapitullin 23 “Gjyqësori dhe të Drejtat Themelore”, si pjesë e Ekipit Negociator për anëtarësimin e Shqipërisë në BE. Në cilësinë e zëvendësministres, portofoli i saj përfshinte kuadrin strategjik në fushën e drejtësisë dhe antikorrupsionit.

Toni Gogu - Ministria për Marrëdhëniet me Parlamentin (Zëvendëson Taulant Ballën)

Toni Gogu është jurist dhe më herët ka mbajtur pozicionin si Zëvendësministër i Drejtësisë dhe në legjislaturën e X të Parlamentit të Shqipërisë si deputet i qarkut të Tiranës.

Gogu ka një përvojë të gjatë në administratën publike dhe në hartimin e politikave ligjore që lidhen me transparencën, konfliktin e interesit dhe qeverisjen e mirë./CNA