web counter
LEXO PA REKLAMA!

SHKARKO APP

App Store
Google Play

Në cilat bashki do të zhvillohen zgjedhje?/Ndryshimet në kampin socialist

11 Shtator 2025, 14:32, Politikë CNA

Në cilat bashki do të zhvillohen zgjedhje?/Ndryshimet në kampin

Gjashtë bashki të vendit pritet të zhvillojnë zgjedhje të parakohshme për shkak të ndryshimeve në kampin socialist, nga kryebashkiakë që ndodhen pas hekurave si rasti i Erion Veliajt dhe deri te kryebashkiakë të dorëhequr, të cilët u bënë pjesë e zgjedhjeve të 11 majit, apo si rasti më i fundit i kryebashkiakut të Vlorës, Ermal Dredha, i cili u dorëhoq ditën e mërkurë.

TIRANA

Kryeministri Edi Rama, në mbledhjen e Asamblesë Kombëtare të Partisë Socialiste, ka urdhëruar Këshillin Bashkiak të Tiranës që të shkarkojë kryetarin e burgosur, Erion Veliaj. Gjatë fjalës së tij, Rama ka deklaruar se Veliaj duhet të shkarkohet, në mënyrë që të hapet rruga për mbajtjen e zgjedhjeve të reja në Tiranë.

Në fjalën e tij kreu i qeverisë Edi Rama ka propozuar Ogerta Manastirliun si kandidate për kryetare të Bashkisë së Tiranës.

VLORA

Një ditë më herët, Ermal Dredha u dorëhoq nga posti i kryetarit të Bashkisë së Vlorës, duke u hapur kështu rrugë zgjedhjeve të parakohshme në këtë bashki.

Me një letër të publikuar në rrjetet sociale këtë të enjte, ai i është drejtuar opinionit publik duke treguar arsyet e dorëheqjes së tij, si kryebashkiak i Vlorës. Dredha theksoi se ky vendim nuk nënkupton largim nga përgjegjësia publike, por është një akt i vetëdijshëm për të krijuar hapësirë për ide dhe ritme të reja zhvillimi për bashkinë.

Kryeministri Edi Rama, në mbledhjen e Asamblesë Kombëtare të Partisë Socialiste, ka komentuar edhe dorëheqjen e Ermal Dredhës. Pavarësisht kritikave për punët në këtë bashki, Rama tha se dorëheqja e Dredhës është tregues i një njeriu që e do Vlorën. Sipas Ramës, i vetmi problem që pati ishte se u zbut më shumë seç duhet.

BERATI

Edhe në Berat pritet të mbahen zgjedhje, pasi Ervin Demo u dorëhoq nga posti i kryebashkiakut për të garuar në zgjedhjet e 11 majit, duke marrë mandatin e deputetit. Rama, këtë të enjte, e propozoi Demon edhe si ministër i Shtetit për Pushtetin Vendor.

TEPELENA

Edhe Tepelena do të shkojë në zgjedhje, pasi kryebashkiaku Tërmet Peçi u dorëhoq për të garuar në zgjedhjet e 11 majit, duke marrë mandatin e deputetit.

CËRRIKU

Edhe qyteti i Cërrikut do të ketë të njëjtin fat, pasi kryebashkiaku aktual i Cërrikut, Andi Salla, u propozua në Asamblenë e PS-së nga Rama për postin e ministrit të Bujqësisë. Për të mbajtur postin e ministrit Salla do të duhet të dorëhiqet si kryebashkiak, duke u hapur rrugën zgjedhjeve të reja në këtë bashki.

MATI

Kryebashkiaku i Matit, Agron Malaj, u dorëhoq për të garuar në zgjedhjet e 11 majit, nga ku mori mandatin e deputetit, duke lënë kështu postin vakant në Bashkinë e Matit./ CNA





Lajmet e fundit nga