Pas shkrirjes së LSI-së që u bë PL/ "Mbyllet" Meta, fushatë në selinë e tij

21 Tetor 2022, 11:20, Politikë CNA

Pas shkrirjes së LSI-së që u bë PL/ "Mbyllet"

Ilir Meta pasi iku nga Presidenca u rikthye në LSI, ndërroi emrin e partisë dhe u bë kryetar i saj.

Në këto kushte ai paralajmëroi revolucion se do të rrëzojë qeverinë, se do të denoncojë afera të mëdha, ndërsa sot shfaqet duke bërë fushatë nga selia e tij.

Dhe jo fushatë me anëtarë të PL-së, se ata kanë avulluar që në kohën e LSI-së, por duke dalë drejtpërdrejt në rrjete sociale dhe njëherësh edhe në media.

Një fushatë virtuale, ku ka folur për arsimin dhe rritjen e çmimeve.

Sipas tij edhe në Ukrainë, në vendin ku po zhvillohet lufta, çmimet janë më të lira.

“Si shpjegohet që çmimet në Ukrainë janë më të lira se në Shqipëri. Si shpjegohet që çmimet në Kosovë, në Maqedoni në Malin e Zi janë më të lira se në Shqipëri. Si shpjegohet që çmimet këtu janë më të larta në rajon dhe më shumë se 90% e vendeve të BE. Sepse ky është një armik i betuar i prodhimit vendas”, është shprehur Meta.

Më tej kreu i PL-së thotë se kanë inicuar ndryshime të rëndësishme në radhë të parë për të hequr kufizimet për bizneset që investojnë në impiante fotovoltatike që këtë të drejtë ta ketë AKBN dhe jo ministria.

“Ky do të ishte një kontribut shumë i madh për konsumatorët familjarë, dhe jo vetëm, por dhe për bizneset për ta zgjidhur vetë çështjen e energjisë. Sepse brenda 4 vitesh ky investim është i vetëshlyer. Menjëherë pas kësaj iniciative, ky sharlatan del dhe kërcënon prodhuesit vendas të energjisë elektrike. Të cilët kanë mbajtur peshën kryesore të prodhimit. Ky do t’i vërë tatim të jashtëzakonshëm si etërit e tij dikur, për arsye se këta ia japin FTL”, është shprehur më tej Meta./CNA.al