web counter
LEXO PA REKLAMA!

SHKARKO APP

App Store
Google Play

E fundit!

x

Nga Rama, Veliaj dhe Berisha te Meta/ Si u vendos politika në sulm ndaj SPAK-ut

14 Prill 2025, 15:09, Politikë CNA

Kreu i SPAK-ut, Altin Dumani, raportoi të hënën në KLP punën vjetore të institucioneve që drejton, ku ndër të tjera ngriti si shqetësim presionin e jashtëm ndaj institucionit. Krimi, aktorë mediatikë dhe politikë janë hedhur në sulm ndaj Prokurorisë së Posaçme. Do të ndalemi te kjo e fundit, politika.

Fillimisht ishin përfaqësuesit opozitarë qe u hodhën në sulm ndaj SPAK-ut, kur me urdhër të Prokurorisë, Gjykata e Posaçme caktoi arrest shtëpie ndaj liderit të opozitës, Sali Berisha. Nga ballkoni i banesës së tij, ku qëndroi prej rreth një viti, para mbështetësve të tij, Berisha sulmonte çdo ditë SPAK-un, drejtuesin e këtij institucioni, teksa akuzohej për korrupsion pasiv në lidhje me dosjen “Partizani”.

“SKAP-i, organizatë kriminale”, “Dumani fle mbi dosjet e krimit”, “Mercenarë të Edi Ramës”, etj., ishin disa nga akuzat që Berisha bënte nga ballkoni i tij.

Në sulm u hodh edhe Ilir Meta i PL-së, kur u mor nën hetim për një sërë çështjesh dhe për vepra penale si korrupsion, pastrim parash dhe mosdeklarim të pasurisë.

“Organizatë kriminale”, “Drejtësi me regji”, deklaronte Meta për SPAK-un para se të arrestohej.



Ndërsa arrestimin e tij në tetor të vitit të shkuar, e konsideroi rrëmbim banditesk, duke shpërthyer në sulme përmes ushtarëve të tij, apo postimeve në rrjete sociale.


I distancuar deri në këtë moment dukej se ishte pozicionuar kryeministri Edi Rama, i cili theu rregullin e heshtjes me arrestimin e kryebashkiakut të Tiranës, Erion Veliaj.

“Një drejtësi e çalë” deklaronte Edi Rama, ndërsa kërcënonte SPAK-un që të mos guxonte t’i kërkonte telefonin kryeministrit.


Nga ana tjetër nga qelia e burgut të Durrësit, Erion Veliaj me gjuhë rrugaçërore, sulmoi prokurorin dhe gjyqtarin e çështjes së tij, përmes postimeve të vazhdueshme në rrjetet sociale, ndërsa mohonte akuzat e rënda që rëndonin mbi të.

Në 10 shkurt 2025 Erion Veliaj u arrestua pas hetimeve të kryera nga prokurori Olsi Dado dhe me vendim të marrë nga gjyqtari Erion Bani. Po atë ditë Veliaj reagoi me status në rrjete sociale duke sulmuar prokurorin të cilin e cilësoi lunatik dhe të paditur epsharak.

Veliaj vazhdoi për ditë të tëra me të njëjtën gjuhë fyese. Më 11 shkurt Veliaj tregonte se si e kaloi natën e parë në qeli, ndërsa prokurorin Olsi Dado një individ pervers, ndërsa aktakuza, sipas Veliajt, ishte haluçinante dhe perversitet kriminal.



Njëri pas tjetrit, përfaqësuesit e politikës shqiptare u vunë në rresht kundër punës së SPAK-ut, duke e sulmuar kur goditeshin të tyrit, e vlerësuar kur para drejtësisë dilnin kundërshtarët. Kjo tregon edhe presionin e jashtëm që përmendi Altin Dumani në raportin para KLP-së si një ndër problematikat kryesore të Prokurorisë së Posaçme.

Megjithatë kreu i SPAK-ut, në çdo komunikim për mediat ka nënvizuar se nuk ndikohen nga politika. Po ashtu ka vënë theksin se besimi i qytetarëve te ky institucionet është rritur sikurse e kanë dëshmuar edhe sondazhet e ndryshme të kryera në vend./ CNA

 

 





Lajmet e fundit nga