“Modeli ekonomik i Ramës ka dështuar”/ Teliti: Nuk prodhon ndryshime të prekshme për qytetarët

20 Maj 2025, 17:13, Politikë CNA

“Modeli ekonomik i Ramës ka dështuar”/ Teliti: Nuk prodhon

Nënkryetari i Këshillit Bashkiak të Tiranës, Dorian Teliti u shpreh sot një modeli qeverisës dhe ekonomik që Shqipëria, ka dështuar të prodhojë ndryshime të prekshme për qytetarët.

Në një intervistë për ‘Syri TV’, Teliti tha se nëse qeveria Rama vazhdon me këtë rrugë siç është sot në planin ekonomik, rezultati do të jetë i njëjtë.

Teliti kritikoi se modeli i sotëm ekonomik nuk sjell zhvillim, nuk është vizion që hap vende të reja pune dhe nuk zhvillon prodhimin.

“Me rezultatin e zgjedhjeve, nëse mund të quhen të tilla pasi ishin një masakër elektorale, si brenda ashtu edhe jashtë vendit. Ekonomia nuk ndryshon brenda ditës, javës apo vitit. Asgjë nuk ka ndryshuar: kemi të njëjtin model qeverisës, kemi një model ekonomik që nuk mund ta quajmë si model të vërtetë ekonomik, duhet të jemi realistë, kemi të njëjtën administratë publike, të njëjtin nivel taksimi. Pra, çfarë ka ndryshuar?

Dhe varfëria ishte po 42% dhe këtë vit, nga vlerësimi i EUROSTAT, ishte prapë po 42%. Pra, nuk kemi ndryshim, ndonëse ekonomia shqiptare rritet. Ndonëse kemi një rritje ekonomike prej 3-4% vit pas viti, por fakti që varfëria qëndron në të njëjtën masë, tregon se vlera e shtuar e ekonomisë nuk shkon tek të gjithë. Ajo kanalizohet tek një grup i caktuar njerëzish. Të pasurit bëhen më të pasur dhe të varfrit bëhen më të varfër.

Sot kemi 12 vite histori. E dimë që ky model ekonomik sjell këtë rezultat. Nëse qeveria Rama vazhdon me këtë rrugë, siç është sot, rezultati do të jetë i njëjtë. Një ushtrim që përsëritet do të japë të njëjtin rezultat dhe ky është një ushtrim 12-vjeçar. Nëse vazhdohet me të njëjtin model qeverisës, të njëjtin model taksimi, me nivelin e lartë të korrupsionit, e me radhe, për politikat që do të ndalojnë këtë shpopullim masiv që po i ndodh realitetit shqiptar, sidomos largimit të njerëzve të aftë për punë, rezultati do të jetë i njëjtë: do të kemi varfëri të lartë në rajon.

Ky model i sotëm ekonomik nuk sjell zhvillim, nuk është vizion që hap vende të reja pune, nuk zhvillon prodhimin. Problemi është se si t’i pasurojmë shqiptarët, si t’i mbushim tavolinat për tu ushqyer. Nuk mund të tolerojmë që 12% e fëmijëve të hanë vetëm një vakt dhe nuk mund ta tolerojmë që ata të jenë të kequshqyer nga ana cilësore, e më pas të bëhen barrë për ilaçet, për buxhetin e shtetit dhe në fund, të jenë të paaftë për punë”,-tha Teliti./CNA