Ku po bëjnë fushatë Alibeaj & CO?

9 Prill 2023, 14:01, Politikë CNA

Foto ilustruese

Teksa jemi rreth një muaj larg zgjedhjeve vendore, partitë politike kanë ndezur motorët e fushatës.

Ndonëse zyrtarisht fushata nis me datën 14 prill, liderët e partive kanë mbledhur ekipet dhe kanë nisur fushatën, kanë dalë në terren, duke u prezantuar planin e tyre, qytetarëve.

Kreu i demokratëve, Sali Berisha, ka filluar takimet në çdo qytet, duke prezantuar kandidatët e koalicionit “Bashkë Fitojmë”.

Sali Berisha

Nga ana tjetër edhe Partia Socialiste e ka gati planin e saj, e cila gjatë fushatës elektorale po planifikon të mbjellë sa më shumë pemë.

Edhe partitë e vogla po dalin në terren për të takuar sa më shumë qytetarë, ndërsa Partia e Vulës duket se ka rënë në gjumë si ish-kryetari i saj, Lulzim Basha.

Kryetari i Partisë së Vulës, Enkelejd Alibeaj, i cili mori dhe vulën, të cilën duket se e mban poshtë jastëkut ku fle, shefi i tij Lulzim Basha dhe grupi i tij, Gazment Bardhi, Jorida Tabaku, nuk duken asgjëkundi.

Enkelejd Alibeaj

Në rrjetet sociale, janë inekzistentë. Nëse u hedhim një sy rrjeteve sociale, si Alibeaj, si Basha apo Bardhi e Tabaku, nuk gjendet asnjë moment takimi me qytetarë apo kandidatë, as një mesazh, as një thirrje e vetme për demokratët për t'i votuar në 14 maj.

Ku po bëjnë fushatë Alibeaj & CO?

Ndërsa partitë dhe liderët e partive të tjera prej më shumë se një jave kanë nisur punën, kandidatët e tyre po prezantojnë planet për qytetarët, Alibeaj i vulës dhe grupi i vulës nuk shfaqen në asnjë zonë, as në terren, nuk kanë paraqitur asnjë plan, pra duket sikur të ishin jashtë garës.

Megjithëse kanë mbetur me 10 kandidatë në të gjithë Shqipërinë, kryetari i vulës dhe grupi i tij edhe në ato zona ku kanë kandidatë nuk janë dukur.

Pra, rrëmbyen vulën, përçanë demokratët, shkatërruan PD-në dhe në fund nuk po bëjnë dot as fushatë.

Kujtojmë se ende pa kaluar 24 orë nga përfundimi i afatit të dorëzimit të listave në KQZ, Alibeaj u braktis masivisht nga kandidatët.

Kryetari i komanduar që po mban peng vulën, nuk arriti dot të bindte demokratët se gjoja përpjekjet e tij u bënë për të mos thelluar më përçarjet.

Ndërsa sot është thuajse i padukshëm për demokratët, të cilët nuk e shohin as në terren, as në zonat ku ka ata pak kandidatë që kanë vendosur të garojnë në siglën e PD-së.

Pyetja që lind është nëse ka ndërmend, kur do të bëjë fushatë Enkelejd Alibeaj, Gazment Bardhi, Jorida Tabaku dhe grupi i tyre.

Kur do të zbulojnë planin për qytetarët?

Me cilat strategji do të mposhtin kundërshtarët e tyre, apo duke qenë inekzistentë gjatë fushatës, duke fshehur poshtë jastëkut vulën?/ CNA.al