web counter
LEXO PA REKLAMA!

SHKARKO APP

App Store
Google Play

Berisha prezanton Igli Carën për Durrësin/ Më 14 maj do rivendosim pluralizmin

8 Prill 2023, 13:29, Politikë CNA
Berisha prezanton Igli Carën për Durrësin/ Më 14 maj do
Kryetari i PD-së, Sali Berisha

Durrësi i ka rezervuar një pritje madhështore kryetarit të PD-së, Sali Berisha, ku prezantoi kandidatin e koalicionit “Bashkë Fitojmë” për këtë bashki, Igli Carën.

Berisha bëri thirrje që më 14 maj qytetarët të rivendosin me votë pluralizmin dhe të votojnë për ndryshimin dhe Igli Carën për Kryetar Bashkie. 

Ai deklaroi se Cara do të dëshmohet një shërbëtor i përkulur përpara qytetarëve dhe një drejtues i përkushtuar përpara qytetarëve të Durrësit.

“Mesazhi juaj në këtë ditë të shenjtë dy herë, ditë Ramazani, por edhe prag i Pashkëve, është një mesazh që tejkalon Durrësin dhe pushton mbarë Shqipërinë, është një mesazh fantastik, është një mesazh historik.

Mesazhi juaj është mesazhi i ndryshimit të Durrësit; mesazhi juaj është për mbarë shqiptarët, ndryshimi i Shqipërisë; mesazhi juaj është mesazhi i shpresës së pashuar te shqiptarët. Rroftë Durrësi, rroftë Shqipëria!

Ne sot jemi këtu për idealet tona të lirisë, ne jemi sot këtu për idealet më fisnike të njeriut, për të mbështetur së bashku Igli Carën, kandidatin e lirisë, kandidatin e vullnetit tuaj, qytetarin shembullor, intelektualin e shkëlqyer, politikanin e urtë, të vendosur.

Është nder i madh për mua të paraqes këtu para jush Igli Carën, me bindjen më të thellë se Igli Cara me besimin tuaj, me votën tuaj, me mbështetjen tuaj do të dëshmohet një shërbëtor i përkulur përpara jush, një drejtues i përkushtuar përpara qytetarëve të Durrësit.

Igli Cara me mbështetjen tuaj do ndryshojë Durrësin dhe do ndikojë në ndryshimin e mbarë Shqipërisë. Igli Cara, të gjitha potencialet e këtij rrethi të bekuar do i shndërrojë në shërbime dhe mirësi.

Më 14 maj, ju me Igli Carën, me një mision historik, do rivendosni në Durrës pluralizmin. Më 14 maj, ju me Igli Carën, do i thoni ndal të keqes. Mençuria e durrsakëve fton çdo qytetar të këtij rrethi të votojë më 14 maj ndryshimin.

Një fjalë e urtë popullore thotë: E keqja nuk ka fund. Nuk ka të vërtetë më të hidhur se kjo. Por e keqja nuk ka fund kur burrat dhe gratë e virtytshëm qëndrojnë indiferentë ndaj saj. Unë kam bindjen se me 14 maj ju do votoni për ndryshimin e Durrësit, ndryshimin e Shqipërisë”, theksoi Berisha./ CNA.al





Lajmet e fundit nga