E fundit!

16:30 Kronika

Rrezikuan pushuesit/ Bllokohen dy gomone në Vlorë, ndëshkohen drejtuesit

Dy gomone të cilat kanë lundruar në afërsi të brigjeve dhe...

"Kobure e propagandës së qeverisë"/ Boçi: "Acromax"-i bllokon mediat që thonë të vërtetën

20 Qershor 2024, 14:02, Politikë CNA

"Kobure e propagandës së qeverisë"/ Boçi:

Luçiano Boçi, foto: LSA

Veprimtaria e "Acromax"-it në vendin tonë e trumbetuar si garantuese e së drejtës së autorit lë dyshime të mëdha. Censura ndaj mediave në Shqipëri nuk është risi, por fenomen që është forcuar edhe më shumë në 12 vitet e fundit.

I pyetur për censurën që u bëhet medieve, për CNA TV, nënkryetari i PD-së, Luçiano Boçi, e quajti veprimtarinë e "Acromax"-it, kompanisë së Aldor Ninit, si abuzive. Ai e cilësoi si kobure të propagandës së qeverisë për të bllokuar media që thonë të vërtetën.

"'Acromax'-i është një kobure e propagandës së qeverisë. Është një shoqëri gjermane që ka realizuar kontrata me qeverinë shqiptare, por edhe me një pjesë të madhe të televizioneve gjoja mbi të drejtat e autorit, por pas saj fshihen të gjitha sulmet politike që u bëhen opozitës dhe mediave opozitare, mediave që transmetojnë të vërtetën, media që dëshmojnë për afera dhe korrupsionin masiv që ka ndodhur në Shqipëri. Madje veprimtaria e 'Acromax'-it është shumë e dyshimtë, është kritikuar edhe nga 'Reporterët pa Kufinj'. Ka goditur, ka bllokuar aktivitetin e shumë medieve që janë kritike ndaj qeverisë siç është edhe rasti i CNA-së. Sulmet e saj janë jo thjesht bllokuese, por edhe filtruese. Luhet me diabolizëm në këtë rast nga qeveria shqiptare për të goditur mediat opozitare në vend, pra për të censuruar median dhe fjalën e lirë. Unë pretendoj që të gjitha mediat që goditen nga 'Acromax', të fillojnë çështjet gjyqësore ndaj kësaj kompanie. Mendoj që duhet të vihet para përgjegjësisë si një kompani që fsheh të ardhurat që siguron në Shqipëri, por edhe që realizon një luftë të tillë censuruese të denoncuar edhe nga institucionet që mbrojnë punën e gazetarëve dhe lirinë e gazetarëve", tha ai.

Nënkryetari i PD-së, Luçiano Boçi, theksoi ndër të tjera se prej vitesh opozita ka kundërshtuar mënyrën e funksionimit të "Acromax"-it edhe në Komisionin e Medias. Ai i bëri thirrje AMA-s që të ushtrojë detyrën e saj për kontrollin e ligjshmërisë së veprimeve të "Acromax"./CNA