Situata në PD dhe krijimi i partive të reja/ Boçi: Bashkim për të qenë forcë e madhe

20 Qershor 2024, 13:50, Politikë CNA

Situata në PD dhe krijimi i partive të reja/ Boçi: Bashkim

Luçiano Boçi, foto: LSA

Në një intervistë për CNA TV, nënkryetari Luçiano Boçi komentoi situatën brenda Partisë Demokratike dhe theksoi se zgjidhja është bashkimi me qëllim për të qenë një forcë e madhe politike.

"Me gjithë iniciativën tonë dhe partive të tjera politike për të krijuar konfederatën, ka pasur skepticizëm dhe hezitime nga parti të spektrit të djathtë, por sot të gjitha janë rrëzuar sepse pjesa juridike e lokomotivës së opozitës është përcaktuese në autoritetin e krijimit të koalicioneve. PD-ja me autoritetin e rikthyer ngjall besim. Tendenca është që konfigurimi të zgjerohet për të bërë një betejë me mazhorancën duke u paraqitur si alternativë e besueshme para shqiptarëve, jo vetëm me vizion dhe ide, por edhe si forcë numerike. Në fund të ditës politika është matematikë votash dhe votat janë kontributi që vijnë nga shumë drejtime dhe kanë rëndësinë e tyre", u shpreh ai.

Lëvizjet brenda së djathtës për krijimin e fraksioneve apo partive të tjera opozitare, për nënkryetarin e PD-së janë tregues i demokracisë që ka kjo parti, por që në të njëjtën kohë duhet të vijnë si kërkesë e shoqërisë, në të kundërt janë vetëm meteorë.

"Në natyrën e PD-së ofrohet shumë demokraci e brendshme. Ka gjithmonë ikje, skizma. Brenda PD-së ka iniciativa të tilla për shkak se edhe dimensioni i lirisë së figurave që vijnë te PD-ja është shumë i madh. Ndoshta këtu ka një defekt, mungesë disipline politike nga vetë njerëzit që aderojnë. Unë nuk e shoh si të metë, por si një gjë të mirë. Partitë politike duhet të krijohen jo në raport me ambiciet personale apo dëshirat për të mbajtur karrige kryetarësh partish. Partitë politike janë kërkesë e shoqërisë. Në rastin kur këto parti siç janë sot, në shumicën e rasteve janë pjesë e egove personale, sigurisht janë meteorë që shuhen shpejt, siç ka ndodhur me shumë parti", u shpreh ai.

Boçi sqaroi edhe rastin e çështjes "non grata" të kreut të PD-së, Sali Berisha, duke u shprehur se kemi të bëjmë me një vendim komisioni në Mbretërinë e Bashkuar dhe jo vendim gjykate dhe se e gjithë kjo në Shqipëri nuk ndikon në uljen e profilit politik të Berishës./CNA