web counter
LEXO PA REKLAMA!

SHKARKO APP

App Store
Google Play

E fundit!

x

Duka, thirrje PS-së dhe PD-së/ Ligji zgjedhor duhet të reformohet, jo të arnohet

20 Qershor 2024, 12:51, Politikë CNA
Duka, thirrje PS-së dhe PD-së/ Ligji zgjedhor duhet të
Agron Duka, kreu i PAA

Partia Agrare Ambientaliste është seriozisht e shqetësuar për zvarritjen pa arsye dhe shumë të dëmshme, që i bëhet reformimit të sistemit zgjedhor. Pas dështimit të turpshëm të Komisonit të Posaçëm të Reformës, i cili nuk arriti të ndryshonte as edhe një presje në tri vjet jetë, sot një tjetër komision, i njohur si Gurpi i Dialogut, krijuar si një përpjekje për të vijuar punën e komisonit të mëparshëm, po bën të njëjtën gjë.

Komisoni i krijuar me konsensus mes të gjitha palëve, mblidhet për të shqyrtuar çështje tërësisht periferike, edhe pse të nevojshme në lidhje me zgjedhjet, por nuk ka prekur ende asgjë thelbësore sa i takon reformës së vërtetë.

Edhe pse qeveria nisi një tur takimesh me emigrantët, ende asnjë hap nuk është bërë për votën e tyre.

Kryetari i Komisionit Qëndror të Zgjedhjeve Z.Ilirian Celibashi, pak ditë më parë i kujtoi sërish Kuvendit se duhej të ndërmerrte ndryshimet ligjore për t'i hapur rrugën KQZ-së të ngrinte infrastrukturën për votën e diasporës. Kjo sërish nuk po ndodh!

“Duhet të jetë e qartë që nëse Kuvendi nuk bën plotësimin që vendimi i GJK kërkon, më vjen keq të them se nuk do të jetë e mundur të zhvillohet votimi nga jashtë për vitin 2025 dhe KQZ të ketë rol në këtë pjesë”, – kjo ishte deklarata e Z.Celibashi vetëm 10 ditë më parë në Komisionin Parlamentar të Ligjeve, duke paralajmëruar se as në 2025 shqiptarët që jetojnë jashtë nuk do të votojnë.

Kujtojmë se për këtë çështje ka një vendim të Gjykatës Kushtetuese, i cili duhet zbatuar. Kjo nuk varet nga vullneti i Partisë Socialiste. Vendimet e gjykatës nuk duan vullnet politik, por janë detyrim për t'u zbatuar.

"Ne si Parti Agrare Ambientaliste presim ndërhyrje thelbësore në Kodin Zgjedhor, për të lejuar koalicionet parazgjedhore dhe për të hapur listat, në mënyrë që të krijohet frymëmarrje për partitë e vogla, dhe për t'u dhënë mundësi garimi të barabartë edhe subjekteve të reja politike.

Ne shikojmë një përpjekje të qëllimshme për të penguar ndërhyrjet thelbësore në kodin zgjedhor, për t'i bërë atij vetëm disa arnime sipërfaqësore e për ta shitur më pas si reformë. Por kjo nuk është një reformë. Ky nuk është një ligj që siguron zgjedhje të drejta, të lira dhe të barabarta.

Ne u bëjmë thirrje dy partive që mbajnë edhe kryesimin e këtij komisoni, Partisë Socialiste dhe Partisë Demokratike, që të bëjnë hapa para dhe urgjent për të kapur afatet kushtetuese.

Ne i bëjmë thirrje faktorit ndërkombëtar që të ushtrojë ndikimin e tij për të demokratizuar ligjin zgjedhor, pa pritur minutat e fundit.

Nga ligji zgjedhor do të varet standardi i zgjedhjeve. Ligji aktual është bërë për t'i garantuar mbështetje atij që ka pushtetin dhe për të ndëshkuar të tjerët", thuhet në deklaratë./ CNA

Duka, thirrje PS-së dhe PD-së/ Ligji zgjedhor duhet të





Lajmet e fundit nga