web counter
LEXO PA REKLAMA!

SHKARKO APP

App Store
Google Play

Ish-kandidatja demokrate: Duhet ndryshuar imazhi i PD-së, Berisha të reflektojë

9 Janar 2026, 15:15, Politikë CNA

Ish-kandidatja demokrate: Duhet ndryshuar imazhi i PD-së, Berisha të

Ish-kandidatja e PD-së për deputete, Ilirjana Kuçana, kritikoi sot frontin opozitar, teksa theksoi se nevojitet më shumë moral dhe koherencë politike.

E ftuar në "A2 CNN", Kuçana u shpreh se në situatën në të cilën gjendet Partia Demokratike, kryedemokrati Sali Berisha duhet të reflektojë dhe të bëjë ndryshime, që do të sillnin një efekt edhe tek imazhi i partisë.

“Nga kontaktet që kam pasur dhe nga ajo çfarë pashë gjatë rrugës, vura re se shumë figura që iu bashkuan Frontit për Shpëtimin e Shqipërisë në vitin 2022 nuk ishin prezent në atë tryezë dhe kjo më vjen keq. Ndiej keqardhje, sepse janë njerëz me kontribute në shoqërinë civile. Janë njerëz që kanë bërë beteja dhe kauza publike. Nuk e di nëse nuk janë ftuar apo kanë refuzuar të jenë pjesë e kësaj tryeze. Atëherë besoj se Partia Demokratike do të duhej të kishte gjetur personin e duhur për t’i bërë ftesat e shoqërisë civile. Nuk ka qenë personi i duhur ai që është marrë me organizimin. Pra, jo zoti Berisha, por ai që është marrë me organizimin. Aty ka çaluar puna, te personi që ka dërguar ftesat.

Shoqëria civile funksionon ndryshe. Janë njerëz të lirë. Shoqëria civile ka një mënyrë dhe një mekanizëm ndryshe funksionimi. Është shumë e rëndësishme që, kur i fton në një tryezë të shoqërisë civile, ata duan të shohin të ngjashmit e tyre, njerëz me të cilët kanë bërë beteja bashkë, kanë qenë krah për krah. Patjetër që duan të shohin edhe moral, duan të shohin koherencë. Duke qenë se Fronti për Shpëtimin e Shqipërisë, në njëfarë mënyre u braktis nga Partia Demokratike, mendoj se edhe Fronti sot e ka braktisur atë tryezë. Kjo, besoj, është arsyeja pse një pjesë e madhe e tyre nuk kanë qenë pjesë e asaj tryeze.

Për mua më vjen keq kur nuk i shoh ata intelektualë që realisht përfaqësojnë figurën intelektuale, fytyrën intelektuale, mendimin intelektual. Do të doja shumë që ata të ishin aty dhe më dhemb kur nuk i shoh në tryezë disa prej njerëzve që janë mendimtarë, njerëz që janë, po e them hapur, filozofë në qasjen dhe mendimin e tyre. Problemi këtu është se njerëzit që përzgjedh zoti Berisha për të organizuar këtë tryezë, dhe jo vetëm kaq, por edhe rreshti i parë i Partisë Demokratike, duhet të rishikohet. Duhet ndryshuar imazhi i Partisë Demokratike, sepse për disa figura që janë sot në Parti, njerëzit nuk afrohen.

Shpresoj fort që deri në muajin mars, kur kemi zgjedhje në Partinë Demokratike, zoti Berisha të reflektojë dhe të bëjë ndryshime. Nëse nuk i bën, edhe unë do ta mendoj angazhimin tim politik, sepse nuk mund të qëndroj me disa njerëz për të cilët e gjithë Shqipëria thotë me zë të lartë se nuk mund të jenë më aty. Opozita duhet të përfaqësohet nga figura që ngjallin shpresë, qytetari, që kanë bërë diçka në jetën e tyre. Ka figura që nuk kanë ditur të bëjnë punë tjetër përveç politikës dhe, nëse i nxjerr nga politika, mbeten pa bukë. Ky nuk është modeli i duhur”,-tha Kuçana./CNA





Lajmet e fundit nga