web counter
LEXO PA REKLAMA!

SHKARKO APP

App Store
Google Play

"Falja e taksave për kompanitë e huaja"/ Pretendimet e Tabakut: Propozimi i socialistëve në prag të zgjedhjeve

22 Janar 2025, 13:19, Politikë CNA

"Falja e taksave për kompanitë e huaja"/ Pretendimet e

Deputetja e Partisë Demokratike, Jorida Tabaku, foli në mbledhjen e Komisionit të Ekonomisë dhe Financave, duke kundërshtuar ashpër propozimin e socialistëve për faljen 10-vjeçare të taksave për kompanitë e huaja që investojnë në turizëm.

Tabaku e ka quajtur këtë nismë një dhuratë për oligarkët e turizmit, që lë pas dore shumicën dërrmuese të qytetarëve shqiptarë dhe bizneset e vogla.

“Kur miratuam buxhetin në dhjetor, qeveria premtoi se nuk do të kishte ndryshime fiskale, as përjashtime, as privilegje.

Por, vetëm një muaj më vonë, socialistët sjellin një nismë që shkel premtimet e veta dhe dispozitat ligjore, duke falur taksat për një grusht kompanish në prag të zgjedhjeve”.

Tabaku kritikoi edhe shtyrjen e Ligjit për Investimet Strategjike për të tetën herë, duke e quajtur atë një shembull të qartë të kapjes së ligjit nga interesat private.

"Këto ligje nuk janë më të përkohshme. Përfitimet për një pakicë po kthehen në normë, ndërsa bizneset e vogla dhe fermerët përballen me një barrë të rëndë fiskale.

Si mund të justifikoni që hotelet e mëdha të huaja përjashtohen nga taksat, ndërsa strukturat akomoduese shqiptare në vijën bregdetare, që punësojnë qindra njerëz, paguajnë gjithçka?”.

Tabaku hodhi dyshime mbi të dhënat e Ministrisë së Financave, e cila pretendoi krijimin e 888 vendeve pune nga këto përjashtime fiskale.

“Sa janë të punësuarit në hotele që nuk përfitojnë këto privilegje? Po 300,000 fermerët që punojnë çdo ditë pa asnjë përjashtim fiskal, çfarë mbështetje kanë marrë? Si mund të mbyllim sytë ndaj kësaj pabarazie?”. /CNA

 

 





Lajmet e fundit nga