Denoncimi i PD-së: Peleshi ‘maskon’ zyrën e PS-së si zyrë të KQZ-së pranë Konsullatës në Selanik

22 Janar 2025, 10:40, Politikë CNA

Denoncimi i PD-së: Peleshi ‘maskon’ zyrën e PS-së si

Partia Demokratike, në një deklaratë për mediat përmes përfaqësuesit ligjor të partisë, Ivi Kaso, ka denoncuar kreun e grupit të PS-së se po 'maskon' zyrën e PS-së si zyrë të KQZ-së pranë Konsullatës shqiptare në Selanik për të manipuluar votën e Diasporës në 11 maj.

Kaso u ka bërë thirrje shqiptarëve në Greqi që të mos gënjehen nga afërsia e zyrës me konsullatën shqiptare dhe të kuptojnë se të dhënat që japin aty i shkojnë PS-së dhe rrjetit të patronazhimit.

Po ashtu i ka bërë thirrje KQZ-së, Komisionerit shtetëror të zgjedhjeve, të sqarojë qytetarët se KQZ ka zyra vetëm në Tiranë dhe operon përmes sajtit zyrtar online.

“Niko Peleshi, prej 21 vjetësh në pushtet, sa në Korçë e sa në Tiranë, për të mbetur në pushtet sa më gjatë është gati të bëjë gjithçka brenda e jashtë ligjit.

Ai, bashkë me lukuninë e ministrave dhe drejtorëve të pushtetit, janë sulur në Greqi e gjetkë, për të patronazhuar vullnetin e shqiptarëve duke keqpërdorur të dhënat e tyre.

Si pjesë e këtij plani për manipulim të votës së 11 majit, ai ka hapur një zyrë të PS ngjitur me konsullatën e Shqipërisë në Selanik dhe e paraqet si zyrë shtetërore të KQZ-së. Siç është në traditën e komunistëve, përziejnë shtetin me partinë.

U bëjmë thirrje shqiptarëve në Greqi që të mos gënjehen nga afërsia e zyrës me konsullatën shqiptare, edhe kjo një shkelje më vete, dhe të kuptojnë se të dhënat që japin aty i shkojnë PS-së dhe rrjetit të patronazhimit.

Komisionerit shtetëror të zgjedhjeve i bëjmë thirrje të sqarojë qytetarët se KQZ ka zyra vetëm në Tiranë dhe operon përmes sajtit zyrtar online.

Çdo zyrë që paraqitet si e KQZ-së është një përpjekje e Rilindjes për të manipuluar dhe gënjyer emigrantët shqiptarë.

Patronazhimi dhe keqpërdorimi i të dhënave personale në këto zyra cenon standardin e zgjedhjeve, rrëmben kompetencat dhe autoritetin e KQZ-së dhe përbën vepër penale.

Pamjet e shumta dhe flagrante të këtyre zyrave të pushtetit të hapura në diasporë, do të duhet të ishin motiv shqetësimi si për Komisionerin e të dhënave personale, i cili s’ka hezituar të marrë masa dhe gjobisë opozitën në zgjedhjet vendore.

Zyrat elektorale për patronazhimin e të dhënave, duhet të jenë në vëmendje edhe të SPAK-ut, i cili duhet të hetojë jo vetëm burimin e financimit të tyre, por dhe të hetojë e parandalojë që nga zyra patronazhimi të mos kthehen në zyra shitblerjeje vote.

PD do të jetë vigjilente në monitorimin e tyre dhe me referimin në organet ligjzbatuese të çdo shkeljeje që ndodh në to, dhe për këtë fton gjithë qytetarët në diasporë të denoncojnë pranë PD-së çdo shkelje që ndodh në to.

Ndërkohë, Nikos që garon të dalë kampion i manipulimit të vullnetit të zgjedhësve për t’iu rikthyer në qejf shefit të vet, i themi që korçarët, pogradecarët, devollinjtë, por edhe Maliqi e Pusteci e kanë ndarë mendjen që të mos votojnë për përmbushjen e çerek shekullit të Nikos në pushtet, por për të ardhmen e fëmijëve dhe vendit të tyre”, tha Kaso./ CNA