Erald Kapri vlerëson figurën e Llazar Fundos: Një nga ideatorët e Bashkimit Europian, themelues i së majtës moderne

16 Tetor 2025, 14:42, Politikë CNA

Deputeti Erald Kapri ka folur për figurën e intelektualit të shquar Llazar (Zai) Fundo, teksa diskutohet në parlament raporti i veprimtarisë së Institutit të Studimeve për Krimet dhe Pasojat e Komunizmit në Shqipëri për vitin 2024.

Në fjalën e tij në Kuvend, Kapri është shprehur se Llazar (Zai) Fundo ka qenë një nga ideatorët e Bashkimit Europian.

Deputeti ka deklaruar se Llazar (Zai) Fundo u vra me urdhër të ish-diktatorit Enver Hoxha dhe sipas ligjit recensues të këtij parlamenti, asnjë studiues dhe vetë instituti nuk mund të studiojnë këtë krim të komunizmit.

Kapri ka propozuar si rekomandim për sesionet e tjera ose komisionet të rikthehet ligji siç ka qenë më përpara që një krim i tillë të studiohet pasi figura të tilla si Llazar (Zai) Fundo nuk mund të lihen në harresë.

Ai është shprehur se Llazar (Zai) Fundo ka qenë një figurë e nderuar, paneuropiane, themelues i së majtës moderne.

“Legjislatura e kaluar ka bërë një ndryshim ligjor te ligji për Institutin e Krimeve dhe Pasojave të Komunizmit duke e censuruar atë.

Duke e detyruar që periudhën e studimit ta bëjë nga 29 nëntori deri në protestat e dhjetorit të 1990.

Me pak fjalë, një instituti publik, Kuvendi i cakton data për pasoja që të mos merren me periudhën e luftës. Tani unë dua të ngre një shqetësim. Po merrja një rast konkret, për një nga themeluesit e së majtës moderne shqiptare, Zai Fundo.

Zai Fundo është vrarë drejtpërdrejt me urdhër të Enver Hoxhës, në fundin e shtatorit të 1944 dhe sipas ligjit recensues të këtij parlamenti, asnjë studiues dhe vetë instituti nuk mund të studiojnë këtë krim të komunizmit.

Tani do të doja të kisha edhe mendimin e kryetarit të parlamentit, edhe për figurën e Zait, edhe për një çështje, sepse babai i kryetarit të parlamentit ka qenë në burg bashkë me Zai Fundon në Ventotene në Itali. Por shteti shqiptar e ndalon ta studiojë këtë figurë, që është një figurë paneuropiane.

Dhe madje siç e thonë shumë intelektualë perëndimorë të kohës së vet, është një nga ideatorët e Bashkimit Europian. Pra, për një figurë të nderuar, themelues i së majtës moderne, shteti shqiptar nuk mund të bëjë asnjë studim sepse qenka vrarë gjatë periudhës së luftës dhe me urdhër të Enver Hoxhës.

Pra, shpresoj ta propozojmë si rekomandim në sesionet e tjera ose komisione, të rikthehet ligji siç ka qenë më përpara. Nuk ka afate në studime dhe nuk mund ta lëmë një figurë të tillë në harresë sepse kështu duan disa”, ka thënë Kapri./ CNA