Drafti për Kodin e ri Penal/ Lamallari: Procesi i mendimeve dhe komenteve duhet të mbyllet brenda 3 muajsh

5 Nëntor 2025, 12:44, Politikë CNA

Drafti për Kodin e ri Penal/ Lamallari: Procesi i mendimeve dhe komenteve

Ministria e Drejtësisë ka zhvilluar ditën e sotme një takim me përfaqësuesit e institucioneve të drejtësisë në lidhje me Kodin e ri Penal.

Në fjalën e mbajtur, Lamallari ka thënë se nevoja për një Kod të ri Penal vjen nga dinamikat dhe konteksti i ri në të cilin ndodhet Shqipëria.

Më tej, Lamallari tha se bashkëpunimi dhe bashkërendimi mes institucioneve të drejtësisë për Kodin e ri Penal është thelbësor.

“Kodi Penal është një ndër aktet më themelore të sistemit tonë juridik dhe si i tillë duhet pashmangshmërisht të reflektojë realitetet e kohës, dinamikat e reja, evoluimin e jurisprudencës, standardet ndërkombëtare dhe natyrisht edhe pritshmëritë e qytetarëve për më shumë siguri dhe drejtësi. Nevoja për një Kod të ri diktohet nga dinamikat dhe konteksti i ri në të cilën ndodhet vendi ynë, tri dekada pas konceptimit dhe miratimit të Kodit ekzistues. Prioriteti ynë është të ndërtojmë një Kod Penal që garanton mbrojtjen e të drejtave dhe lirive themelore të njeriut, forcon luftën kundër kriminalitetit dhe parandalon veprimtari të paligjshme, nga më të thjeshtat tek ato më komplekset, nga format tradicionale tek ato të shfaqura vitet e fundit. Prandaj, bashkëpunimi dhe bashkërendimi midis nesh janë thelbësore. Synimi ynë është që, përmes këtij procesi, të identifikojmë çdo mangësi, çdo paqartësi dhe çdo aspekt që mund të përmirësohet, në mënyrë që Kodi i ri të jetë një instrument sa më efektiv, modern dhe i qëndrueshëm për dekadat që vijnë”, tha ministri Lamallari.

Ministri Lamallari gjithashtu foli për fazën e konsultimit publik, ku tha se nevojitet përmbyllja e procesit të dhënies së mendimeve apo komenteve brenda tre muajve.

Fazë e cila do të pasohet nga një fazë e dytë takimesh në nivel teknik, fazë e cila do të mbyllet brenda gjysmës së parë të 2026.

“Për t’i lejuar kohën e nevojshme dhe të arsyeshme Komisionit Europian për shqyrtimin e draftit përfundimtar dhe më pas ndjekjen e procedurave parlamentare deri në miratimin e tij gjatë gjysmës së dytë të vitit të ardhshëm, diktohet nevoja e përmbylljes së procesit të përftimit të mendimeve apo komenteve me shkrim brenda tre muajve të ardhshëm për të mundësuar në këtë mënyrë një seri të dytë takimesh në nivel teknik me qëllim rakordimin me institucionet kontribuese brenda çerekut të dytë të vitit 2026”, tha Lamallari.