Deklarata e Kos/ Rama: E rëndësishme është që ne të mos kemi veton dhe ata të mos tremben nga vetoja jonë

5 Nëntor 2025, 12:10, Politikë CNA

Deklarata e Kos/ Rama: E rëndësishme është që ne

Kryeministri Edi Rama, në konferencën e përbashkët me ambasadorin e BE-së, Silvio Gonzato, është pyetur edhe për deklaratën e djeshme të komisioneres për Zgjerimin të KE-së, Marta Kos.

Kujtojmë që ditën e djeshme komisionerja Kos u shpreh kundër anëtarësimit të Shqipërisë në BE-së, por pa të drejtë vetoje.

Në lidhje me këtë, Rama tha ditën e sotme se Shqipëria dëshiron të ulet në tryezë si anëtare me të drejta të barabarta, por është e gatshme të marrë pjesë në çdo lloj diskutimi.

Kryeministri deklaroi se është dakord me anëtarësimin pa të drejtë vetoje dhe kjo mund të bëhet thjesht me marrëveshje pa u ndryshuar traktatet.

“Ne duam të ulemi në tryezë si të barabartë. Duam të kemi akses të plotë në të gjithë ngrehinë e BE-së nga pikëpamja e legjislacionit, buxheteve etj. Ata duan të njëjtën gjë, por kanë një frikë. Duke qenë 27 ka vështirësi në marrjen e vendimeve. Tani thonë ata imagjinoni sikur të bëhemi 28... 30 apo ku di unë, se sa e vështirë mund të bëhet. Pavarësisht se ne si ballkanas jemi më të qetë se ata vetë, që janë ballkanizuar ndërkohë.

Ne jemi gati të marrim pjesë në çdo lloj diskutimi. Nuk ka nevojë të bëhet me ndryshime traktatesh, mund të bëhet thjesht me marrëveshje. E rëndësishme është që ne të mos kemi veton dhe ata të mos tremben nga vetoja jonë.

Njëri nga ata të mëdhenjtë më tha që do të hyjmë në BE dhe do ta festojmë bashkë. Ai nuk është më, iku. Kohët kanë ndryshuar dhe ne duhet të adaptohemi me kohën.

Të mos na thonë prisni ju sa të bëjë reformë BE-ja, siç më thoshte një tjetër që është duke ikur tani”, tha Rama./CNA