web counter
LEXO PA REKLAMA!

SHKARKO APP

App Store
Google Play

Dekreti i zgjedhjeve dhe Presidenti që nuk kemi

2 Tetor 2025, 08:02, Politikë CNA


Zyra e Presidentit, pas miratimit të dekretit të zgjedhjeve të pjesshme për 6 qarqe, shpërndau edhe një sqarim të detajuar që shpjegonte në mënyrë ezauruese të gjithë arsyetimin e ndjekur deri në nënshkrimin e dekretit.

CNA.al edhe më parë ka mbajtur të njëjtin qëndrim sa i takon gjykatës kompetente së cilës mund t'i drejtohej Veliaj, në rast kundërshtimi të shkarkimit nga Këshilli i Ministrave.

Sot dallohet qartë se ankimimi i Veliajt nuk u depozitua në Gjykatën Kushtetuese, sepse Veliaj po kërkonte atje të drejtat e tij.

U depozitua atje pikërisht duke shpresuar se duke e depozituar ankimimin në sekretarinë e Gjykatës Kushtetuese, do të bllokonte vijimin e procesit të shpalljes së zgjedhjeve të pjesshme.

Por meqë çështja e juridiksionit të një gjykate nuk ndahet nga qejfi i ankuesve, Këshilli i Ministrave nuk u ndal nga ai ankimim dhe i kërkoi Presidentit shpalljen e zgjedhjeve.

Kujtojmë që Kryeministri shikon lajme po aq sa Presidenti. Rama dhe ekipi i tij kishin parë lajmet e darkës dhe me siguri kishin mësuar që Veliaj kishte depozituar ankim në Gjykatën Kushtetuese kundër vendimit të Këshillit të Ministrave të nënshkruar nga Rama.

Presidenti besohet se kishte parë të njëjtat lajme si Rama, por nxori dekretin, bazuar mbi të njëjtin arsyetim juridik të vendimit të Këshillit të Ministrave.

Pra, si Këshilli i Ministrave, ashtu edhe Presidenti, bien dakord që Gjykata Kushtetuese nuk është gjykata kompetente për të shqyrtuar ankesën e Veliajt.

Por Rama në këtë histori nuk u fsheh. Ishte ai që deklaroi se do t'i kërkonte Këshillit Bashkiak nisjen e procedurave të shkarkimit të Erion Veliajt.

I vetmi që është fshehur është Presidenti!

I kompleksuar nga sulmet e paralajmëruara të Gaz Bardhit, Presidenti nuk pati kurajën as të dilte e ta lexonte tekstin e sqarimeve të dekretit të vet.

Askush nuk beson dot se Begaj është ulur dhe e ka shkruar vetë atë arsyetim. Por për ta lexuar mund edhe ta lexonte, qoftë edhe nëse nuk e kupton dot.

Pyetja është:

Kujt i duhet një President që fshihet edhe ditën kur ka të drejtë?

Kujt i duhet një President që ka frikë nga Gaz Bardhi?/ CNA





Lajmet e fundit nga