“Deficiti tregtar është rritur në 23.6%”/ Teliti: Barra e lartë fiskale po ndikon te prodhuesit vendas

21 Gusht 2024, 14:43, Politikë CNA

“Deficiti tregtar është rritur në 23.6%”/ Teliti:

Këshilltari për ekonominë në PD, Dorjan Teliti

Këshilltari për ekonominë në PD, Dorjan Teliti, hodhi akuza ndaj qeverisë se ka dështuar me programin ekonomik.

Ai tha se në 7 muaj të këtij viti deficit tregtar është rritur me 23.6%. Në deklaratë për mediat, Teliti theksoi se eksportet shqiptare pësuan një rënie me 14.5%, ndërkohë që të fituar kanë dalë ‘miqtë importues’ pasi importet rezultojnë me rritje 3.2%.

“Të dhënat e fundit zyrtare të vetë qeverisë Rama mbi shëndetin e sipërmarrjes, sidomos asaj prodhuese, janë dramatike. Sipas INSTAT-it qeveritar, 7-mujori i këtij viti shënon një rekord të ri të mbrapshtë keqqeverisjeje.

Eksportet shqiptare pësuan një rënie të ndjeshme, duke u ulur me 14.5%, ndërkohë që të fituar kanë dalë ‘miqtë importues’ pasi importet rezultojnë me rritje, konkretisht 3.2%.

Deficiti tregtar u rrit me 23.6% gjatë 7 muajve të parë të vitit, tregues ky i qartë i dobësimit të pozicionit tregtar të ekonomisë dhe prodhuesve shqiptarë krahasuar me vendet dhe konkurrentët në rajon e më gjerë. Arsyet janë disa, por të lidhura drejtpërdrejt me qeverinë dhe politikat e saj okulte.

Shfuqizimi i euros i shkaktuar nga faktorë kryesisht joligjorë që lidhen me pastrimin e miliarda eurove të krimit dhe korrupsionit, mungesa e një pakete ndihme direkte për prodhuesit duke i lënë ata në mëshirë të fatit, barra e lartë fiskale që mbretëron në vend prej 11 vitesh, mungesa e fuqisë punëtore si pasojë e shpopullimit masiv, etj., janë disa prej faktorëve të cilët kanë shkaktuar dhe sjellë këtë përfundim të hidhur për ekonominë dhe prodhuesit vendas”, u shpreh ai.

Ndër të tjera, Teliti deklaroi se Partia Demokratike e ka të qartë vizionin për ringritjen e ekonomisë në Shqipëri, që sipas tij do të nisë me vendosjen e qytetarit në qendër të vëmendjes.

“Ekonomia në krizë prek këdo, pa dallime politike. Drejtojeni gishtin dhe vendosni para përgjegjësisë ata që kanë shkaktuar këtë krizë, te fajtorët e kësaj krize sa ekonomike po aq edhe sociale.

Modeli ekonomik rilindas i fuqizimit dhe pasurimit vetëm të një grushti njerëzish, ndërkohë që ekonomia dobësohet dhe shqiptarët varfërohen, duhet të marrë fund një orë e më parë. Partia Demokratike e ka të qartë vizionin për ringritjen e ekonomisë sonë.

Pas zgjedhjeve të lira e të ndershme të organizuara nga një qeveri teknike, me ardhjen në drejtim të punëve, qeverisja e vogël, por eficiente, e cila vendos në qendër qytetarin dhe sipërmarrjen, me taksat më të ulëta në rajon, me paketa mbështetëse direkte aty ku nevojitet dhe kur nevojitet, me një kuadër të rishikuar për t'u rikthyer lider në thithjen e investimeve të huaja direkte, me masa konkrete për rikthimin e shqiptarëve në vend, etj., do jenë instrumentet që do ringrenë ekonominë tonë duke e futur atë në shinat e zhvillimit, rritjen e produktivitetit dhe pagave, hapjes së vendeve të punës, rritjen e mirëqenies”, theksoi ai./ CNA