web counter
LEXO PA REKLAMA!

SHKARKO APP

App Store
Google Play

Berisha, thirrje qytetarëve: Sot Tirana në duart tuaja

23 Dhjetor 2024, 12:14, Politikë CNA
Berisha, thirrje qytetarëve: Sot Tirana në duart tuaja
Kreu i PD-së Sali Berisha

Kreu i PD-së, Sali Berisha, në një konferencë për mediat u ka bërë thirrje qytetarëve që të bashkohen në protestën e ditës së sotme që do të mbahet në orën 17:00. Berisha u shpreh se sot Tirana është në duart e qytetarëve.

“Sot është dita e një revolte, e mosbindjes civile, të PD-së dhe opozitës, në emër të mbi 1.1 milionë shqiptarëve që u larguan nga Shqipëria nga ky regjim për shkak të varfërisë dhe privimit të lirive.

Është revolta në emër të 800 mijë pensionistëve, që u trajtuan nga kjo qeveri në mënyrën më çnjerëzore.

Pensionistët e Shqipërisë sot marrin një pension të barabartë me 1 qen shtëpie në Gjermani, që paguhet 130 euro.

Është protesta në emër të qindra mijëra të rinjve, të cilët kanë si alternativë të vetme largimin nga Shqipëria.

Është protesta në emër të qindra mijëra fermerëve, të cilët janë fermerët më të diskriminuar të Europës, më të pambështetur, për të cilët në buxhetin e shtetit, ndonëse japin 20 për qind të prodhimit të brendshëm, ndonëse përbëjnë rreth 40 për qind të popullatës, janë parashikuar gjithsej 44 milionë euro.

Është revolta e mbarë shqiptarëve që duan të jetojnë në Shqipëri. Që duan të ndërtojnë jetën, mirëqenien dhe të ardhmen në këtë vend ku plaçkiten nga një grup hajdutësh që nuk i kanë pasur kurrë në historinë e vendit.

Kjo protestë, kjo revoltë zhvillohet edhe në shenjën e sakrificës që demokratët janë të vendosur të bëjnë në emër të shqiptarëve në këto prag festash.

Ndaj ftoj qytetarët e Tiranës dhe mbarë Shqipërisë sot në orën 17:00, marshim në Tiranë, Tirana në duart e qytetarëve”, tha ndër të tjera Berisha./ CNA





Lajmet e fundit nga