web counter
LEXO PA REKLAMA!

SHKARKO APP

App Store
Google Play

Protesta e opozitës/ Këshilltarja e PD: Shkodranët do të jenë në Tiranë për t’i thënë ndal vrasjes

22 Dhjetor 2024, 12:09, Politikë CNA

Protesta e opozitës/ Këshilltarja e PD: Shkodranët do të

Këshilltarja e PD në Këshillin Bashkiak të Shkodrës, Izmira Ulqinaku nëpërmjet një deklarate për mediat ftoi shkodranët t’i bashkohen protestës së thirrur nga opozita të hënën, në Tiranë.

Ulqinaku dënoi edhe miratimin e buxhetit nga këshilltarët e mazhorancës disa ditë më parë në këshillin Bashkiak teksa tha se taksat do të rriten ndjeshëm vitin e ardhshëm me propozim të Kryebashkiakut Benet Beci.

“Të nderuar bashkëqytetarë,

Ky vit po mbyllet me një bilanc negativ për banorët e Shkodrës. Ekonomia e familjeve sa vjen e ulet në kufirin e varfërisë. Vëmendja dhe mbështetja nga shteti nuk duket gjëkundi, përkundrazi viti i ri 2025 pritet të jetë edhe më i vështirë ekonomikisht.

Kryetari i Bashkisë Shkodër i emëruar nga bandat, të enjten prezantoi para Këshillit Bashkiak, buxhetin e varfërimit.

Buxheti i vitit 2025, i cili u votua nga të gjithë përfaqësuesit e mazhorancës, parashikon dyfishim të taksave e tarifave lokale. Nuk parashikon investime serioze nga taksat tona, parashikohen aktivitete sociale të panevojshme ku paratë bëhen tym e vidhen.

Shkodra, ndër qytetet më të varfra në Shqipëri, nuk meriton dyfishimin e tarifës se ujit të pijshëm. Nga 1 janari, shkodranët do të përballen edhe me këtë rritje, përveç dyfishimit të tarifës së pastrimit, ndriçimit e gjelbërimit.

Buxheti 2025 nuk mbështet asnjë kategori të banorëve të Shkodrës:

- Nuk mbështet fëmijët, investim në kopshte çerdhe

- Nuk mbështet çiftet e reja, ndihmë në blerje shtëpie etj

- Nuk mbështet fermerët

- Nuk mbështet familjet e pamundura ekonomikisht

- Nuk mbështet bizneset e reja

- Nuk mbështet asnjë qytetar, por kërkon t'ua nxijë dhe t’i largojë drejt rrugëve të Europës e botës.

Edi Rama e Benet Beci janë si vëllezër në konceptin qeverisës, politika e tyre është dyfishim taksash e tarifash, varfërim dhe vetëm varfërim.

Benet Beci nuk ka propozuar uljen e asnjë takse e tarife, të gjitha i ka rritur pa asnjë lloj arsye.

Ne, përfaqësuesit e Partisë Demokratike e dënojmë këtë model dhe jemi kundër politikave varfëruese.

Me ardhjen tonë në pushtet çdo qytetar do të ndihet i vlerësuar dhe mirëqënia e secilit do të jetë primare. Ekonomia është pika kyçe e programit tonë. Ulje taksash e tarifash për çdo shqiptar, rritje pagash e pensionesh, është ajo çfarë ne do të realizojmë, në mënyrë që të ndalet hemoragjia e të rinjve drejt shteteve të huaja.

Shkodranët nesër do të vërshojnë drejt Tiranës, për të reaguar ndaj padrejtësive, për t’i dhënë një goditje të fortë regjimit varfërues.

Nesër e hënë, datë 23 dhjetor, ora 17:00, shkodranët do të jenë në Tiranë për t’i thënë ndal vjedhjes e pasurimit të pushtetarëve.

Ftoj secilin prej jush, të bëhemi bashkë!

Është radha jonë!” , deklaron Ulqinaku./ CNA





Lajmet e fundit nga