"Beqaj-Rama, pronarë të sterilizimit"/ Berisha: Rritën 83 herë çmimin për njësi të sterilizuara

4 Korrik 2024, 22:01, Politikë CNA

"Beqaj-Rama, pronarë të sterilizimit"/ Berisha: Rritën

Kryetari i Partisë Demokratike, Sali Berisha

Kryetari i Partisë Demokratike, Sali Berisha, ka komentuar arrestimin e ish-ministrit të Shëndetësisë, Ilir Beqaj.

Në fjalën e tij në tubimin në rrugën e “Mustafa Matohiti”, Berisha ka akuzuar kryeministrin Edi Rama dhe Ilir Beqajn se janë pronarët e sipërmarrjes që rriti 83 herë çmimin për njësi të sterilizuara.

“Ilir Beqaj është pronari së bashku me Edi Ramën i sipërmarrjes së sterilizimit, me të cilën ata rritën 83 herë çmimin për njësi të sterilizuar. 83 herë rritje e deklaruar nga KLSH. Rritje që tejkalon çdo lloj imagjinate. Fituesi i sterilizimit është miku i Edi Ramës, i cili e kishte mahnitur atë për suksesin e tij në Itali me ndërmarrjen e ndërtimit me dy punëtorë të regjistruar.

Ilir Beqaj është personi që i caktoi kësaj kompanie të Rrapajt pikët dy herë më të mëdha se kompanisë tjetër. Ilir Beqaj është personi që i dhuroi kësaj kompanie, katin e tërë të spitalit, aparaturën ultramoderne të blerë me taksat e qytetarëve shqiptarë për sterilizimin e mjeteve. Ilir Beqaj është hajduti i Edi Ramës, i cili i dhuroi falas kësaj kompanie të tij dhe të Edi Ramës, ujin, energjinë elektrike, lokalet.

Kurse Edi Rama i çmendur, i marrosur nga vjedhja dhe pasurimi i paligjshëm kalonte nga studio në studio për të mbuluar krimin e tij të shëmtuar me një gërshërë të thyer dhe pincë me një krah dhe tregonte se ja me çfarë operoheshin, duke bërë idiotin, tutkunin se gërshëra e thyer nuk pret, se pinca me një krah nuk ka dhe nuk përdoren kurrë.

Por duhej me çdo kusht të mbulonte vjedhjen e tmerrshme, e cila po tejkalonte të gjitha limitet. Vetëm në gjysmën e kohës u vodhën 76 milionë euro. Por këta hajdutë xhelatë morën qindra e qindra jetë njerëzish sepse në Tiranë dhe në mbarë Shqipërinë, spitalet, pavijonet kirurgjikale nuk blinin dot setet kirurgjikale që u nevojiteshin për operacione”, u shpreh kreu i PD-së.

Ai denoncoi se ka pasur kërcënime publike nga ish-ministri i Shëndetësisë ndaj kryeministrit Edi Rama në lidhje me hetimet për aferën e strelizimimeve dhe Check Up-it në shëndetësi.

“Komisioni i KLSH-së ka gjetur se Vilma Nushi, e cila meriton çdo epitet, por unë nuk po e prish gojën, është paguar në 2 vjet, nga Beqaj dhe Korba e Kovidit për 455 mijë analiza të pakryera kurrë. A ka krim më të shëmtuar se ky? Në një kohë kur qytetarët e varfër mbeten viktimë e pamundësisë për të bërë një analizë.

Shesin ç’kanë dhe nuk kanë për të paguar analizat që u duhen për diagnozë. Kurse Beqaj i Ramës dhe Korba e Kovidit i paguanin Vilmës 455 mijë analiza të pabëra kurrë. Miqtë e mi, një debat të zhvilluar midis Edi Ramës dhe Ilir Beqës, në të cilën Edi Rama gati sa nuk po i thoshte se ti Ilir ke ngrënë dardha, nuk ia dha dot, se Iliri e kuptoi dhe i tha: Atë Vilmën ma ke sjellë ti, unë nuk e kam njohur kurrë.

Kjo është e vërteta. Po kaq janë vjedhjet e tmerrshme me analiza. Asnjë i burgosur, asnjë i dënuar. Po kaq janë vjedhjet dhe dënimi me vdekje të të sëmurëve me sëmundje të rënda duke mos u dhënë ilaçet. Duke mos marrë mjekimet që meritonin”, theksoi Berisha./ CNA