Balluku i kundërpërgjigjet Berishës/ “Ju ka mbetur vetëm balta, do t’i përpijë pranverën që vjen”

2 Dhjetor 2024, 14:46, Politikë CNA

Balluku i kundërpërgjigjet Berishës/ “Ju ka mbetur

Numri dy i qeverisë, njëherësh ministrja e Infrastrukturës dhe Energjisë, Belinda Balluku, u është kundërpërgjigjur akuzave të kreut të PD-së, Sali Berisha, për Portin e Durrësit, i cili e quajti aferën më të madhe korruptive.

Përmes një reagimi në rrjetet sociale, Balluku është shprehur se opozitës i ka mbetur vetëm balta, e cila do t’i përpijë pranverën që vjen.

Balluku theksoi se “Shqipëria 2030” ka dalë nga balta dhe as nuk ndalet më, as nuk kthehet më kurrë në baltën e atyre që luftojnë kundër interesave të saj.

“Lufta kundër projektit strategjik të portit të ri të Durrësit është luftë kundër vendosjes së Shqipërisë në hartën e Mesdheut si një pikë e re e rrjetit të tregtisë navale.

Është luftë kundër fuqizimit të Kosovës dhe Maqedonisë së Veriut, si pjesë integrale e projektit të portit të ri, ku në Prishtinë dhe Shkup do të ndërtohen dy porte të thata të lidhura me Durrësin.

Është luftë kundër hekurudhës Durrës - Prishtinë dhe Korridorit 8 që pa portin e ri të Durrësit nuk bëjnë asnjë sens. Është luftë kundër sigurisë së Shqipërisë dhe rajonit, që me krahun ushtarak të NATO-s në projektin e portit të ri të Durrësit ngrihet në një nivel tjetër.

Është luftë kundër vetë interesit strategjik të Shqipërisë dhe prandaj është një luftë e humbur, e cila bëhet nga ata që kanë dhënë prova se edhe e kanë djegur Shqipërinë për interesat e tyre.

Sot u ka mbetur vetëm balta që edhe e eksportojnë jashtë në media të huaja, për t’u dukur më të besueshëm kur e hedhin pastaj këtu. Por sa më shumë baltë të hedhin, aq më thellë ajo baltë do t’i përpijë pranverën që vjen, kur do ta marrin përgjigjen jo me baltë, po me votat e shqiptarëve.

Shqipëria 2030 ka dalë tanimë nga balta dhe as nuk ndalet më, as nuk kthehet më kurrë në baltën e atyre që luftojnë kundër interesave të saj. Ajo do të ecë edhe më shpejt për t’u ulur në tryezën e Bashkimit Evropian falë mandatit të katërt për Edi Ramën dhe Partinë Socialiste. Pikë!”, shkruan Belinda Balluku./ CNA