Shpërthimi në Zubin Potok/ Meta: Sulm terrorist, SHBA dhe BE t’i bëjnë presion Serbisë

30 Nëntor 2024, 13:55, Politikë CNA

Shpërthimi në Zubin Potok/ Meta: Sulm terrorist, SHBA dhe BE t’i

Kryetari i PL-së, Ilir Meta

Kryetari i PL-së, Ilir Meta, ka reaguar nga burgu lidhur me ngjarjen e ndodhur mbrëmë në veri të Kosovës, ku shpërtheu me eksploziv kanali i ujit të Ibër-Lepencit.

Meta ka dënuar sulmet në Zveçan dhe shpërthimin e kanalit të ujit, ndërsa ka bërë përgjegjëse Serbinë për të gjithë situatën.

Ai ka kërkuar që vendet partnere ndërkombëtare, SHBA dhe BE të dënojnë sulmet dhe t'i ushtrojnë presion Beogradit zyrtar për të hequr dorë nga aktet që rrezikojnë paqen, stabilitetin dhe sigurinë.

“Dënoj me ashpërsinë më të madhe sulmet e fundit terroriste në stacionin policor në Zveçan, në Komunën e Zveçanit dhe shpërthimin e detonuar ndaj kanalit kryesor të Ibër Lepencit, prej nga furnizohen me ujë disa qytete në Kosovë, si dhe Korporata Energjitike e Kosovës.

Ky sulm kriminal dhe terrorist, që ka synuar të dëmtojë infrastrukturën kritike dhe ndër më të rëndësishmet të Kosovës, vjen nga bandat e dirigjuara dhe të orkestruara nga Serbia, që ende nuk i ka dënuar këto akte kriminale.

Fajin dhe përgjegjësinë për këto sulme terroriste nuk e ka formati ekzistues i dialogut mes Kosovës dhe Serbisë, por mungesa e plotë e vullnetit të Beogradit zyrtar për respektimin e marrëveshjeve me Prishtinën zyrtare, si edhe marrja zyrtarisht në mbrojtje nga Serbia të strukturave kriminale, me në krye Millan Radojçiçin, që mbështeten nga institucionet serbe, që kanë glorifikuar edhe sulmin terrorist në Banjskë, si edhe nga ata shqipfolës, që i mbajnë ison Serbisë, që mbështesin dhe implementojnë nisma proserbe si "Ballkani i Hapur" apo që fajësojnë dhe penalizojnë qëndrimet parimore dhe patriotike të Qeverisë së Kosovës, siç ka vepruar dhe vepron çdo ditë Edi Rama.

Partia e Lirisë, në mbështetje të palëkundur të popullit dhe institucioneve, të integritetit territorial dhe sovranitetit të Republikës së Kosovës u bën thirrje të gjithë vende partnere ndërkombëtare, Shteteve të Bashkuara të Amerikës dhe Bashkimit Europian, të dënojnë me forcën më të madhe këto sulme terroriste, si dhe t'i ushtrojnë presionin e duhur Beogradit zyrtar për të hequr dorë nga këto akte kriminale që rrezikojnë paqen, stabilitetin dhe sigurinë në rajonin tonë”, ka theksuar kreu i PL-së./ CNA