E fundit!

21:22 Aktualitet

Tubimi i 45-të/ Protestuesit marshojnë në rrugët e Tiranës me thirrje kundër qeverisë

Protestuesit janë larguar nga Kryeministria pas përfundimi...

Balla: Në rrugën tonë të bashkimit me BE-në, çdo lloj forme diskriminimi është e papranueshme

10 Dhjetor 2025, 12:04, Politikë CNA

Balla: Në rrugën tonë të bashkimit me BE-në, çdo

Komisioni i Ligjeve ka nisur shqyrtimin e projektligjit “Për disa shtesa dhe ndryshime në ligjin nr. 10221, datë 04.02.2010, ‘Për mbrojtjen nga diskriminimi’”, ku janë propozuar rregullime të reja që synojnë forcimin e mbrojtjes ligjore ndaj çdo forme diskriminimi.

Në fjalën e tij, kreu i Grupit Parlamentar të PS-së, Taulant Balla, theksoi se ndryshimet e vitit 2020 zgjeruan gamën e shkaqeve të ndaluara të diskriminimit, duke përfshirë edhe elemente si shtetësia. Ai theksoi se në procesin e integrimit europian, Shqipëria duhet të garantojë standardet më të larta të mbrojtjes së të drejtave të njeriut.

“Në rrugën tonë të bashkimit me BE-në, çdo formë diskriminimi është e papranueshme dhe nuk përputhet me vlerat e familjes së madhe europiane,” deklaroi Balla.

Ai u ndal veçanërisht te diskriminimi gjinor, duke theksuar se ky është shpesh baza mbi të cilën lindin format e dhunës me bazë gjinore dhe seksuale.

Balla paraqiti këtë fazë të re të përditësimit të ligjit si një proces të domosdoshëm pas analizimit të praktikës së deritanishme dhe zhvillimeve të pesë viteve të fundit.

“Ndryshimet mbartin një përafrim të plotë të legjislacionit tonë me atë të Bashkimit Europian dhe synojnë të garantojnë një mburojë më efektive kundër çdo forme diskriminimi. Nga viti 2020 deri në 2025 janë shfaqur forma të reja diskriminimi, të cilat kërkojnë përgjigje të qartë ligjore,” u shpreh ai.

Ndryshimet e reja prekin përkufizimet bazë të ligjit, duke saktësuar nocionet që lidhen me diskriminimin dhe duke adresuar mungesat ekzistuese, si rasti i konceptit të shqetësimit si formë diskriminimi, i cili më parë nuk ishte i përcaktuar plotësisht.

Sipas Ballës, projektligji synon të forcojë kontrollin dhe garantimin e mbrojtjes për çdo qytetar shqiptar, si në sektorin publik ashtu edhe në atë privat, duke siguruar që ligji të jetë një instrument real mbrojtjeje dhe jo vetëm formal.

Projektligji do të vijojë të shqyrtohet në komisionet parlamentare përpara kalimit në seancën plenare./ CNA